327/2026-2027

Dated Aizawl, the 29th April 2026: Vawiin chawhma khan Planning & Programme Implementation Department buatsaih Mizoram Grand Challenge hmawr bawkna leh lawmman semna hun chu Bible Society of India Auxilliary Hall, Aizawlah neih a ni a. Mizoram State Planning Board Vice Chairman, Dr Kenneth Chawngliana chuan hun a hmanpui a ni.

Dr Kenneth Chawngliana chuan India ramin kawng hrang hrangah hma a sawn zel thu leh, Mizoram pawh state dang te ruala hmalam pana a pen a pawimawh thu a sawi a. Mizoram Sawrkar pawhin ruahmanna hrang hrang a neih thu leh Thalaite thuamchak (Youth Empowerment) chu Sawrkar tum lian tak a ni a ti a. Hmasawnna tak tak thlen tur erawh chuan Sawrkar chakna ngawt a tawk lo a, mipuite nen thukhat vua a thawhho a tul thu a sawi.

Mizoram Grand Challenge hi thil thar inthlensiak (innovation competition) a ni a. Team anga tel theih niin, mi zawng zawng tana hawn a ni. Open Category leh College Category a then hran leh a ni a. Team tin te hian challenge area thlan sa 8 atangin an duh ber an thlang leh thei a. Chungte chu – Agriculture, Handloom & Handicraft Development, Tourism Development, Urban & Infrastructure, Education, Health, Environment, leh Climate Change te an ni. An area thlante an zirchian theuh hnuah a chinfel dan tur ruahmanna an siam te chu mithiam hrang hrangte hmaah phochhuakin, category tin atangin a titha zual pali theuh thlan chhuah an ni.

Mizoram Grand Challenge ah hian team 28 atangin mi 112 an tel a. March ni 19, 2025 khan Orientation leh Mentoring hun hman a ni a. April ni 28 khan team 19 ten Demo Round neiin category tina a tithate lawmman hlanna vawiinah neih a ni a. Lawmman pakhatna hian cheng nuai khat, pahnihnain cheng sing sarih, pathumnain cheng sing nga, leh palinain cheng sing thum a keng a ni.

Open Category a lawmman latute chu:
1. Kut Hnathawktute Thian, Haulawng (Soil Amendment and Marketing of Ginger)
2. CT Institute (Integrated Lifetime and Nutrition system)
3. Mizo Farm Solutions (Establishment of post-harvest infrastructure)
4. KWS (App based tracking, collection, and recycling of waste)

College Category a lawmman latute chu:
1. Blue Hills, Govt. Zirtiri Residential Science College (Mizoram Digital Tourism Eco System)
2. Innovisionaries, Pachhunga University College (Project Cleanest City 2030)
3. The 7 Auroras, Govt. Saitual College (Progressive Web App)
4. GHBC Team 1, Govt. Hrangbana College (Embracing Sustainability in Tourism)

He hunah hian Planning & Programme Implementation Department Official-te, Participant-te leh, St.Pauls Higher Secondary School naupangte an tel a. Pi B Vanlalruatin lawmthu sawiin hun a khar a ni.