4319/2023-2024

Aizawl, the 22nd March, 2024: Tukin dar 10:00 khan Directorate of Health Auditorium-ah Health and Family Welfare Department hnuaia Mizoram Health Systems Strengthening Project (MHSSP) buatsaih Stakeholder Consultation (inrawnkhawmna) meeting vawi 2-na neih a ni a, a hmingah "Damna Kawl Eng" vuah a ni.

Inrawnkhawmnaah hian MHSSP hotute chuan he project thiltum zinga langsar zual chu vantlang hriselna lam enkawlna tur ruangam tha zawk te, a hun taka enkawlna pe thei tura inruahmanna te, health insurance scheme leh thawktu lam tihphuisui te a ni tih an sawi a. Mipuite hnena natna inkaichhawn theih loh chi langsar zual, non-communicable diseases (NCDs) chungchang zirtirna uar zawka kalpuite, NCDs service kaltlanga mipui hriselna tha zawk a awm theihna atana vantlang theihna hman tangkaite pawh an ngaipawimawh thu an sawi.

He hunah hian National Health Mission hotute, District hrang hrang Health Department aiawh te, MHSSP thawhpui pawl aiawhte, Lai, Chakma leh Bru hnam aiawhte, Mizoram University aiawh leh The World Bank team member-te an tel a ni.

MHSSP hi World Bank puihnain kum 2021 khan Mizoramah hawn tan a ni a, Mizoram sawrkara Health and Family Welfare Department hnuaiah awmin, State chhunga hriselna lama hmalakna chak leh tha zawk awm theihna tura hmasawnna thlentir chu a thiltum ber a ni.