392/2024-2025

Kolasib dated 1st May 2024: District Information & Public Relations Office-a hnathawh dan leh inrelbawl dan kalhmangte zirchiang turin Mizoram Information Service 2024 batch-te chuan ‘District Office Orientation Program’ nei turin Kolasib, Lunglei leh Champhai district-te an tlawh dawn a. Vawiin khan Kolasib DIPRO Office tlawhin Kolasib district-a hnathawh dan hrang hrangte inhrilhhriatna hun Dr. Hmingthanzuala, DIPRO hovin neih a ni.

‘District Office Orientation Program’ Kolasiba neih ah hian Pu John LT Sanga, Deputy Commissioner chuan DC Conference Hall-ah MIS Officer tharte chu inkawm hona hun a neih pui a. Tunlai khawvel thiamna thang zel ah ‘Information’ rintlak lakkhawm leh pekchhuah pawimawh zia tarlangin a hun tak ah, a dawng tur tak ten ‘Information’ an dawn thinna hian harsatna, buaina leh inhriatthiam lohna thleng thei a ven phah thin thu a sawi. Information Officer-te chu sawrkar tha tichak tur a thawktu pawimawh tak an nih thu Deputy Commissioner chuan sawiin mipui leh sawrkar inkar a inlaichinna tha siamtu hmanraw tangkai tak an nih bawk thu a sawi a. An thiamna leh theihna te chu thahnemngaihna nen ram tan a hmang zel turin MIS Officer tharte chu a chah bawk a ni.

Thutkhawmna ah hian Pi Christina Lalmuanzuali, SDO (Sadar) chuan Deputy Commissioners’ Office-a hnathawh dan hrang hrang sawi zauna hun neiin DIPRO Office-te nen a thawhhona tha neih a pawimawh zia a sawi.

Vawiin hian DIPRO Office-a hna hrang hrang kalpui a nih dan te, Advertisement Rules leh Documentation chungchangah Pu Hmingthanzuala, DIPRO chuan zirtirna a pe a. Technical Equipment chi hrang hrang hman dan te entir niin School of Nursing, Thingdawl te tlawhpui an ni a. Naktuk hian Training hi Kolasibah neih chhunzawm tur a ni.