Vawiin chawhnu khan Mizoram Journalist Association chuan tun thla tawpa superannuation pension a chawl tawh tur I&PR Director Pu David L. Thangliana, MIS chu “Mizoram Journalist Workshop, 2019” denchhenin I&PR Auditorium ah thlahna hun an buatsaih.

I&PR Director thlahna hun hi Pu Zonunsanga Khiangte, President, MJA General Hqrs. in a kaihruai a, I&PR Director chu officer thawhpui nuam leh biak nuam tak ani a ti a, a hova kum khat leh thla nga hun an hman chhung hian Journalist te tana chhinchhiah tlak thil tam tak a tihsak ani a ti a. Thla sawmpasarih  chhung Director anih laiin MLA election leh Lok Sabha Election in a nang a, Model Code of Conduct vangin hun engemawchen hna thawh theihloh a a awm avangin a hmachhawp  tam tak a ti hman lova, heti chung pawh hian chhinchhiahtlak hna tam tak a thawk hman tho ani tiin lawmawm a tih thu a sawi a ni.

Pu H. Lalthansanga, President, MJA Lunglei District pawhin thusawiin I&PR Director chu thawhpui nuam, thil tul leh ngaihpawimawh an thlen thin te pawh tha taka lo dawngsawng thin anih thu a sawi a, Lunglei Dustrict MJA hminga lawmthu sawina leh ngaihhruina thilpek Pu Lalrintluanga Khiangte, Vice-President in a hlan a ni.

Pu S. Lalhmachhuana, Prominent Journalist, Kolasib District pawhin thu sawiin kum 1985/86 bawr vela Kolasib Sub-Division a a awm laiin Project site visit te an lo neih ho thin tawh thu te, sawrkara a thawh chhungin chanchinbumiten an mamawh an thlen tea ma levela tihhlawhtlin theih chi chu dan phal chinah a tihhlawhtlin zel thu sawiin tun thlenga nung taka la kal Kolasib Officers’ Club dintu anih thu a sawi bawk.

Serchhip District MJA aiawhin Pu C. Ramengmawia, President leh Champhai District aiawhin Pu C.Lalhlupuia ten thlahna thu an sawi a, Pu T.Lalhmachhuana, Editor, Dingdi Daily Newspaper pawhin thlahna thu a sawi bawk a ni.

I&PR Director chuan thlah phulo a intih thu leh a inthlahrun thu sawiin rokhawlhna avanga a tih tum leh hmachhawp tam tak a ti hmanlo chu hrehawm a tih thu leh MJA member te lakah a inthlahrun thu a sawi a, heti chung pawha programme hrang hrang department hminga an buatsaih thinah te MJA member ten phur tak leh thatho taka an telpui thinna leh an tawiawm thatnaah lawm thu a sawi a ni. I&PR leh MJA ten thawhhona tha tak an neih chhunzawm zel a duhsak bakah I&PR Department pawh officer fel leh tha tak tak an neihbelh  zel avangin hma a sawn zel dawn a, media te tan pawh thil lawmawm ani a ti bawk. MJA member te chu Mizoram tana pawimawh an ni tih inhrethar a, tih hun leh hunlo te, huaisen hun te hre thin turin a chah a, a hun chhunga thawhhona tha tak an neih avangin lawmthu a sawi bawk a ni.