Vawiin khan DC Conference Hall Mamitah Pu Jacob Lalawmpuia, Addl.DC hovin Mizoram Kailawn 2018 Outreach leh Awareness Programme May Ni 2 a neih tur chungchangah Programme felfai taka ruahman a nih theih nan Meeting neih a ni.

Mizoram Kailawn hi sumdawng mi leh eizawnna kawnga mahni kut leh ke-a din tumte tana eizawnna kawnga ruahmanna-a inelna (Business Plan Contest) leh eizawnna kawnga mahnia intodelh tumte intawhkhawmna (Entrepreneurship summit) a ni a. New Economic Development Policy (NEDP) hnuaia Entrepreneurship Development Scheme niin Mizo mipui sumdawnna kawnga tuimi leh eizawnna kawnga mahni kut leh ke-a din tum tlatte tana ruahmanna a ni.

May Ni 2, zing Dar 11-ah Chhimveng YMA Hall-ah he Outreach Programme hi neih tura ruahman a ni a. Sumdawnna kawnga bultan dan tur hi mithiam bikte (Master Trainers) leh sumdawnna kawnga mi hlawhtlingte'n Training an rawn pe dawn a. Mizoram Kailawn, 2017 finalist-te atang pawhin he Business Plan Contest Mizoram Kailawn-a an tel dan leh an sumdawnna tura ruahmanna an siam dan leh an hmachhawpte sumdawnna lama mahni kut leh ke-a din tum kalkhawmte hnenah zirtirna an pe dawn bawk a ni.

Mizoram Consultancy Group (MzCG) Team-te'n Mizoram Kailawn-a Business Plan Contest a tel tum leh tel duhte tan a chipchiara Application thehluh dan leh buaipui dan an zirtir dawn bawk.

Mamit mipuite sumdawnna lama tuimi leh eizawnna ngialnghet neih tumte tan tel vek turin Mamit District Administration leh Mizoram Entrepreneurship Development Monitoring Committee (MEDMOC) chuan a sawm a ni.

 

Attachment

  • Loading attachment...