No.6667/2020-2021

Lawngtlai, Sahmulphah thla ni 25, 2020: Vawiin khan Mizoram Sanitation Task Force (MSTF) hnuaia Mizoram Khawpui Fai Inelna, 2020 buatsaih endiktute (Panel of Expert) chuan Lawngtlai khawpui an endik.

Panel of Expert-ah hian member pali - Prof. Malsawmliana, Assistant Secretary, CYMA; Dr Saithantluangi Zote, MIS, IPRO, I&PR Department; Pi R. Lalrinfeli, Programme Officer, NGC, MPCB leh Pu Lal Rinmawia, Secretary i/c Organisation, Mizoram Journalists’ Association te awmin, anni bakah hian Urban Development & Poverty Allleviation Department ai awhte an tel bawk a. Zing lamah Siaha khawpui an endik hnuah, chawhnu lamah Lawngtlai khawpuiin faina kawnga hma an lakna kawng hrang hrangte hi an endik a ni.

He'ng endiktute hian khawpui chhung hmun hrang hrang an en kual hnuah Lawngtlaia NIC Conference Hall-ah UD&PA Lawngtlai District-a thawktute nen faina kawnga Lawngtlai khawpuiin hma a lak dan chungchangah inkawm hona buatsaih a ni a. He hunah hian District Project Officer (DPO) Pu V. Lalruatliana chuan powerpoint presentation hmanga entirin an hma laknate a sawi fiah a. COVID-19 hri leng avangin kum dang anga hma lak theih ni lo mah se, sawrkar, khawtlang, pawl leh mipui thawh hona avangin faina kawnga hma lakna chu a kal reng tih a sawi a. Khawpui cheimawina kawng bakah, plastic hnawmhnawk leh bawlhhlawh thliar hran leh sawngbawl kawnga District hmachhawp te a tar lang bawk.

He hunah hian endiktute chuan District hma lak dan hriat chian nan zawhna hrang hrang an zawt a. Fai tawh tih a awm theih loh thu leh faina kawngah chuan hmasawn zawnga ke pen zel a tul  thu sawiin, faina chu inelna ang chauhva thlir lo va, hriselna leh hmasawnna kawnga tihmakmawh a nihna hmuh thiam a tul thu an sawi a. Khawpui chhung an fannaah faina kawnga hma lakna kal mek hmuh tur tam tak a awm chu lawmawm an tih thu sawiin, tha thlah lova chhunzawm zel turin mipuite an chah a ni.

Mizoram Khawpui Fai Inelna endiktu (Panel of Expert)-te hi vawiin vek khan Lunglei panin an chhuak leh nghal a ni.

Mizoram Khawpui Fai Inelna 2020 hi thuang (category) thuma kalpui niin, category-I-ah district headquarters 11, category-II-ah khawpui (town) dang 12 leh category-III-ah a pumpuiin khawpui 23 te an inel dawn a ni.