Chief Minister Pu Lal Thanhawla chuan Mizoram khua leh tui zawng zawngte hi hnam chi khat anga kan awm a tul a ni a ti. He thu hi nimina Mara Students Organisations’ (MSO) Joint Hqrs, Aizawl ina Annual Freshers Social vawi 36-na Vanapa Hall-a an buatsaiha a sawi a ni.

Chief Minister chuan kam ram hi ram te tak, ami chengte pawh nuai 10 awrh chauh kan ni a, inla hrang tham kan awmlo a ni a ti. Ami cheng ang ang te hi lungrual taka kan tan tlan chuan hnam zahawm, hnam chak leh mite hmuhsit theih lohah kan in siam thei a ni a ti a, chuvangin kan inlungrual a pawimawh hle a ni a ti. Hemi kawnga Naga te entawn tlak atih thu sawiin, an ramah chuan an hnam peng hrang hrang, Sema, Ao, Lotha tih anga hriat hlawh zawk an nih laiin, pawn lamah chuan Naga an ni tawp mai a ni a ti a. Chuvangin keini Mizorama chengte pawh hi hnam chi khat anga Mizo nih tawp hi thil harsa a nilo a ni a ti.

Chief Minister chuan Mara ten chhim lam hmun kilkhawr taka cheng anga an ingaih thinna hi paih thei se a duhthu a sawi a. Mizorama cheng zawng zawngte hi intluktlang taka an kal chhoh hi an duh ber a ni a ti a. Nakin lawkah chhim hi Mizoram kawtchhuah tur a ni tiin, tuna Kaladan Multi Modal Transport Project bul tan mek hi puitlin anih hunah chuan India hmunpui te leh Asia chhimchhak ram te nen inkalpawhin, Mizoram chhim lam hi hmunpawimawh tak ala ni dawn a ni a ti a. Hemi thlir chung hian leh bungraw phurh leh zin man tlawm zawk anih avangin Lawngtlai thleng rel kawng siam hi central sorkar pawhin a thuphungin a remti tawh a ni a ti. Pu Lal Thanhawla chuan Autonomous District Council te tana direct funding chungchang pawh a tul anga hmalak mek zel anih thu sawi bawkin, tuin nge an hmakhua ngai tih chhut thin turin zirlaite chu a chah bawk a ni.

Khualzahawm Pu S.Hiato, Minister for PHE etc. pawhin thusawiin, Mara zirlaite chu Mizoram tan, India tan an zir a ni tih hre reng turin a chah a. Inkiltawihna rilru an put thinte chu paih bo a, an zirlaiah leh infiamna lamah te a ber nih tum tlat thin turin a chah bawk a. Mara zirlai ten inelna lian tham, competitive exam-ah te, Matric ah te a ti tha pawla an hming a lan hian a thinlung taka a lawm thinzia a sawilang bawk a ni.

MSO hi kum 44 a upa a ni a, kum 1967 khan Minister S.Hiato hi President hmasa ber a lo ni tawh a ni. Functionah hian Pu P.P.Thawla, MLA pawh a tel a ni.