1212/2026-2027

Aizawl, the 29th June, 2026: Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan 20th Battalion Assam Rifles hnenah hnathawh that chawimawina Governor's Unit Citation a hlan.

Durbar Hall, Lok Bhavan-a Investiture Ceremony neihah Larsap General (Dr) Vijay Kumar Singh chuan Mizoram an awm chhunga an hnathawh entawntlak tak avanga Governor's Unit Citation chawimawina dawngtu 20th Battalion Assam Rifles-te a lawmpui thu a sawi a. Indo-Myanmar ramri buai em em laia ramri venhim hna thawh kawnga battalion hmalaknate chhuanawm a tih thu sawiin, enforcement agency dang leh intelligence unit lamte nen tha taka thawk hovin, ramri kaltlanga ruihhlo tawlh leh dan lova sumdawnna hrang hrang ven kawnga an hnathawhnte fakawm a tih thu a sawi bawk.

Larsap chuan India hmarchhak venghimtu leh tlang mite thian nihna chawinunga khawtual mite nen lungrual taka an thawk ho thin leh mipui vangtlang rawngbawlna hrang hrang tha taka an kalpui thin chu fakawm a tih thu sawiin, hei hian sipai leh mipui inkarah inpawhna tha zawk siamin Asaam Rifles thuvawn Seva, Suraksha and Bandhutva (Rawngbawlna, Venhimna leh Inunauna) chu a takin a rawn pholang a ni, a ti a. Mizoram tana battalion hnathawh leh thil hnutchhiahte hriat reng a nih tawh dawn thu sawiin, a hnu zela awm ten tha taka an chhunzawm zel a beisei thu a sawi a. An awmna apiangah Assam Rifles tihmingthaa chawilartu nih tum zel turin duhsakna a hlan a ni.

He hunah hian Brig. Puspendar Sorayan, DIG, 23 Sector Assam Rifles; Pu Krashnendra Singh, CE, Pushpak; Col Jaswinder Singh, SM, Commandant, 20th Battalion Asaam Rifles leh Assam Rifles official dangte an tel a ni.

20th Battalion Assam Rifles-te hi 23 Sector HQ Assam Rifles, Aizawl hnuaiah November ni 12, 2023 atanga March ni 19, 2026 chhung khan Lunglawn, Lungleiah an awm a ni.