4114/2024-2025

Aizawl, the 6th February, 2025: Vawiin khan Mizoram Larsap Gen (Dr) Vijay Kumar Singh, PVSM, AVSM, YSM (Retd) chuan 23 Sector Assam Rifles Headquarters, Khatla, Aizawl chu tlawhin Assam Rifles hotute a kawm. 

Larsap Gen (Dr) Vijay Kumar Singh, PVSM, AVSM, YSM (Retd) chuan India leh Myanmar ramri vengtu Assam Rifle-te hmalakna fakawm a tih thu sawiin, India ram leh a chhunga chengte himna tura theihtawp chhuah chhunzawm zel turin a chah a. Dan lova ramri kaltlanga chetna ven kawngah tanlak a tul thu sawiin, mipuite rawngbawl hna thawh pawh ngaipawimawh zel turin a chah bawk.  

He hunah hian Larsap hi guard of honour pek niin, Brig Girish Upadhya, SM, VSM, DIG, HQ 23 Sector Assam Rifles, Aizawl leh a thawhpuite'n an lo dawngsawng a. Mizorama Assam Rifle hmalakna leh pawimawh hrang hrangte PowerPoint Presentation kaltlangin an lo hrilhfiah a ni. 

Assam Rifle-te hian Mizoram bikah hian India leh Myanmar ramri 510 Km vela thui ven hna an thawk mek a. 23 Sector Assam Rifles Hqrs. Khatla, Aizawl hnuaiah hian Battalion 3 a awm a. Battalion tinah Company Operating Base (COB) 6 zel awmin, Indo-Myanmar border ven hna ngawrh takin an thawk mek a ni.