1003/2026-2027

Aizawl, the 15th June, 2026: Mizoram Larsap General (Dr) Vijay Kumar Singh, PVSM, AVSM, YSM (Retd) chuan Young Mizo Association (YMA) dinchamphaphak vawi 91-na pualin YMA leh pawl member zawng zawngte duhsakna a hlan.

Larsap General (Dr) Vijay Kumar Singh chuan YMA chu khawtlang, hnam ziarang leh nunphung chawilar leh tihhmasawn kawnga Mizorama tlawmngai pawl lian ber a nih thu sawiin, din a nih atanga vawiin ni thlengin midangte rawngbawl sak kawngah a khaipa ber a ni, a ti. Tanpui ngaite tanpui, Mizo hnam ziarang, nunphung leh rohlu chhawmnun leh chawilar kawngah YMA-in theihtawp a chhuah leh Sawrkar hmalaknate a hlawhtlin theih nan leh zau zawk a thlen theih nana tha taka a tawiawm thin chu fakawm tiin, chhawmnung zel turin a chah a ni.

Larsap chuan YMA Day pualin Mizo mipuite chu an thil tihna apiangah Tlawmngaihna lantir thin tura chahin, mahni inphata, lainatna leh midang tana inpekna nunpui tlat turin a sawm a. Hnam bil hrang hrang inkara inunauna chawilar turte, aia upa zah tur leh mahni hnam tobul nghet taka vuan turte, ruihhlo leh a kaihhnawih laka inthiar fihlim tur leh thalaite hmakhua ngaia theihtawp chhuaha tangruala do let turin a chah a ni.

Larsap chuan Mizoram mipui leh ram pum hamthat nan YMA chuan Sawrkar leh khawtlang huap pawl dangte nen tha taka hma an lak ho zel a beisei thu sawiin, YMA kalzelna turah duhsakna a hlan a ni.