242/2026-2027

Aizawl, the 22nd April, 2026: Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan ICFAI University Mizoram leh Tourism Department tangkawp buatsaih, Youth Festival (Univoyage) 2026 chu ICFAI University Mizoram Campus, Durtlang North, Aizawlah a hmanpui. 

Larsap General (Dr) Vijay Kumar Singh chuan thalaite tih phur nana topic pawimawh tak tak zirna hun, Youth Festival 2026 buatsaih a ni chu lawmawm a tih thu sawiin, an hlawkpui ngei a beisei thu a sawi a. Thalaite chu kan ram nghahfak an nih thu leh ngaihven an tul thu sawiin, hna zawn leh siam nana pawimawh tak, thiamna inzirtirna leh peipunna lam hawi zirtirna ngaih pawimawh a tul thu a sawi a. Mipui nawlpui kawm tama ngaihven peih chu inzirna tha tak anih thu a sawi bawk.

Larsap chuan tourism sector tihchangtlun nana pawimawhte tarlangin, khualzin hip tam deuh deuh turin hmanraw tihchangtlun leh boruak duhawm zawk siam bak Mizoramin mamawh dang a neih loh thu sawiin, sik leh sa nuam, hmun mawi leh boruak thianghlim nei anihna chu tourism tihhmasawn nana tha tak a ni, a ti a. Leilung leh a chhunga cheng nena inrem thlap khualhip dan kalpui thiam a tul thu a sawi bawk a. Thalaite chu nuam ti tak chunga thiam thil zir tura chahin, Youth Festival chuan Mizoram leh a chhunga chengte tan rah duhawm tak a thlen ngei a beisei thu a sawi bawk.

Prof. (Dr.) Ginlianlal Buhril, Vice-Chancellor, ICFAI University Mizoram chuan vawiin hun hman hi kaihruaiin inlawmna thu a sawi a. Pi Irene Zohlimpuli Chongthu, Addl. Secretary, Tourism Department, Govt. of Mizoram; Padma Shri Patricia Mukhim, Editor, Shillong Times leh Dr. Theyiesinuo Keditsu, Kohima, Nagaland te hnen atangin thusawi ngaihthlak a ni a. Sawi hona leh zawhna leh chhanna hu  hman a ni a. Dr. David Lawmzuala Registrar, ICFAI University Mizoram chuan lawmthu sawiin hun hman a khar a ni. 

Youth Festival (Univoyage) 2026 hi ni hnih (22-23 April) awh niin, thupui atan "Exploring Diversity, Strengthening Bonds" tih chu hman a ni.