Vawiin chawhnu khan Mizoram State Law Commission Chairman Pu John Siamkunga, MLA kaihhruaiin a pisaah Commission member-ten a vawi 31-na atan an thukhawm.

Pu John Siamkunga chuan member-te chu ram tana hna tangkai thawk an nihna chu a hlu tiin, an thahnengaihna leh taimakna rah chu ramin a hlawkpui a ni, a ti a. Hmasawnna chak taka kalpui tur leh khua leh tui tha nei thei tur chuan ramin dan tha a neih a tul a ni, a ti.

Meeting-ah hian sawrkarin a hmanlai Dan 33 te chu a neitu Department te hnenah an ngaihdan thehlut tura hriattir an ni a, heng zinga 29 te chuan thehlut tawhin Dan 4 dang te chu nghah mek a nih thu tarlan a ni a. Heng an thehluh zirchiang tur hian State sawrkara dan lam thiam bik te ruat ni se tiin thutlukna erawh Law Commission a siam leh ang.

Mizorama kan Dan hman lai te a bik takin Union Territory (UT) kan nih atanga vawiin thlenga Dan awmte en ho a ni a. The Mizoram Appropriation Act 1978 & 1979 (Repeal) Act, 2015 leh The Mizoram Appropriation (Vote on Account) Act 1978 &1979 (Repeal) Act, 2015-te chu November ni 16, 2015 khan notify an lo nih thu tarlan a ni.

Mizoramah Drugs Control Law mumal tak neih a la ni lova, draft bill erawh siam mek niin peih fel thuai beisei a ni. Meeting-ah hian dan thenkhat Autonomous District Council (ADC) huam chhunga hman chi leh chi loh te chungchang sawiho a ni bawk.

Member Secretary Pu Zahmingthanga Ralte leh member Addl. AG Pu A.K. Rokhum, MBA President Pu L.H. Lianhrima, Mizoram Law College Principal Dr. Rualkhuma Colney, Public Prosecutor Pu R.C. Thanga-te an tel a ni.