Ni 7 chhung awh tur Mizoram Assembly 6-na thutkhawm vawi 10-na leh kum 2012-2013 Budget Session chu vawiin khan Larsap Pu Vakkom Purushothaman thu sawi a tan a ni ta.

Mizoram Larsap chuan House Member te chibai buk a duhsakna hlan hmasa in an mawhphurhna leh tihturte hriaa House rorel zahawmna vawng nung reng chunga inkhawm tangkai tak an neih zui a duh thu a tarlang hmasa a ni.

Larsap chuan tun hnaia Village Council leh Local Council inthlanna muanawm leh felfai tak a neih chu lawmthu a sawi a. Vote thlak dan en in mipui rorelna kawnga mipui tha thawh chu thil chhinchhiahtlak a tling a ni a ti. Remna leh Muanna boruak vawng nun tura dan leh thupek tha taka kengkawh leh sorkar tha ngialnghet tak neih reng chu a thil tum bul ber pakhat a nih thu a sawi a ni.

Dan leh thupek kengkawhtu Police thuam chak mek a nih dan te, ram pum huap pawha pawi khawihtu chhuichhuah leh man kawnga an viak that dan te, mihring tawlhruk leh sualna hrang hrang an do let dan a fak thu a sawi lang a.

Larsap chuan sorkar dik leh tha, langtlang leh mipui huap siam tura tan a lakna ah mipui vuivaina thlenna tur MIPUI AW din a nih tak thu a sawi lang a, hei hian vuivaina tam tak a senghawi ngei ang a ti.

NLUP sawi langin Governor chuan kum kal mekah hian chhungkua 20,000 chuang huapin Vaibelchhia 413.27 dah a nih thu a tarlang a, trade hrang hrang thlangtute hmalakna uluk taka vil zui zel an ni a ti.

Mizoram mipui za a 60 zet te chu thlawhhma la a, eizawng an nih avangin Agriculture lamah theihtawp chhuah zui zel a tum thu te leh, kum kalta chhunga, NWDPRA leh WDPSCA hmalakna vangin tlangram loneih chu za a 42 laia hniam tak thu a sawi a.Leilet tui pekna kawngah pawh nasa taka tan lak anih dan leh kum kalta chhung hian ram hectare 2,339 lai khuh hman tum a ni a ti.

Thiamna tak tak paw chhuak tura zirna lam a tan lak anih dan te, RMSA leh SSA hnuaia zirna In sak thar leh cheibawl dante, zirtirtu engemaw zat lak thar mek dan te a sawi lang a.

Horticulture, AH & Vety, Fisheries lama kum kalta chhunga hlawhtlinna hrang hrang te chu vawiin a Larsap thusawi zingah hian tarlan tel a ni bawk.

Mizoram Larsap chuan kum kal mek chhunga thalai infiammite tana a sorkar thil tih tlangpui a tarlang bawk a. Ram chhung leh pawn huapa hmingthatna tam tak state in a hmuh te, infiamna hmunhma changtlung zawk peihfel zingah Thuamluaia Mual Lunglei, Boys Hockey Academy Kawnpui leh Rajiv Gandhi Sports Complex Mualpui a phul lem phah zawh tak te chu a langsar zual an ni a ti a. Infiam mite chawhphurna turin sumfai Rs. 22,02,250 mi 302 hnenah pek an ni a ti.

Khawpui hmasawnna tura hmalakna hrang hrang Governor in a sawi chhuah zingah hian Lunglei leh Serchhip a tui intur thianghlim buatsaih mek thu te, chenna in neilo te tana in sak sak hna kal mekte sorkar laipui a sum hmuh a tangkai thei ang bera hman a nih dan te a tel a ni.

Governor thusawi ah hian kawlphetha hnianghnar zawka deh chhuahna tur project thawh mek chipchhiar taka tarlang a ni bawk a. Inkalpawhna kawngpui siam mek chungchang pawh Governor hian a tarlang bawk a ni.

Sorkar sumpai enkawlna uluk pawimawhzia a sawina ah Larsap chuan tunah hian Treasury ten sum an pek chhuah danah kalphung thar tan mek a ni ta bawk a ti a.

Chhiah petute tan awlsam zawka an pek theihna tur tunlai thiamna hmanga buatsaih a ni a ti.

Hriselna lam, sumdawnna, chhiatrup thulh a sorkar chet lak dan tur, sorkar tha neih kawnga tan lak pawimawhna te bakah ram ngaw humhalh, sik leh sa inthlak ven kawnga a kaihhruai sorkarin kum kalta chhunga a hmalakna hrang hrang te chu vawiin hian Pu Vakkom Purushothaman hian a Budget Speech hmasa ber ah hian a tarlang tel a ni.

Governor chuan heng a thusawite hi a tlangpui zawr zawh anih thu sawiin, sorkar hmalakna leh hmachhawp te chu chipchhiar zawkin House-ah sawi zui anih tur thu a tarlang a. Remna leh Muanna boruak hnuaiah sorkar hnathawk leh mipui mimir in hmasawnna kawng chak taka an zawh zel a duh thu sawiin, a thu sawi tlang a kawm a ni.