Larsap Pu Vakkom Purushothaman chuan vawiin khan Mizoram Legislative Assembly 7-na, Session hmasa berah thu a sawi a, a thusawi tlangpui khaikhawm chu a hnuai ami ang hi a ni e.

Larsap chuan Mizoram Legislative Assembly 7-naah, MLA zawng zawng te chu lawmin anni leh Mizoram mipuite chu duhsakna a hlan. MLA tling thar te chu an hnathawhna theuh a tawnhriat ngah an nih angin Assembly hnathawhnaah a thawhhlawk hle tura a beisei thu a sawi.

Larsap chuan Indian National Congress chuan Sawrkarna an lak leh chhan chu kum nga kalta a mipui tana an inpekna leh an thawhrimna avang a ni tiin Sawrkar chuan mipui beiseina a tihhlawhtlin chhoh zel a beisei thu a sawi bawk.

Inthlanna hlawhtling, fel leh fai leh muanawm tak a awm theihna chhan chu a mawhphurtu Sawrkar hnathawk te leh dan leh thu pek kengkawhtu te thawhrimna, mipui, Kohhran hrang hrang, tlawmngai pawl te leh Mizoram People Forum (MPF) te inpekna leh an hnathawh avang a ni a ti, Larsap chuan.

NLUP chungchang sawiin Larsap chuan NLUP chu Sawrkar chuan a chhunzawm zel dawn a ni, a ti. 11th Plan Period chhunga Ram pum GSDP za zelah 7.8 in a than laiin hemi hun chhung hian Mizoram GSDP chu za zelah 11.0 in a thang a, he GSDP thanna ah hian NLUP in a thawh hlawk hle a ni, a ti bawk.

Larsap chuan Sawrkar-in infiamna chu a ngaihpawih chhunzawm zel tur thu sawiin infiamna ruhrel hmun pakua kalpui mek anih thu te, Olympic Vision 2016 kalpui anih thu te leh Catch Them Young Policy kalpui zel anih tur thu te a sawi bawk a ni.

Kawlphetha lamah intodelhna chu Sawrkar chuan a ngai pawimawh a, hemi atan hian hma a la chho zel dawn a tiin MW 210 pe chhuak thei Tuivai HEP siamna tur sum mamawh vaibelchhe 1750 atanga vaibelchhe 340 Viability Gap Funding kaltlanga tihfel a ni chu, hlawhtlinna pakhat a nih thu a tarlang. Hmasawnna peng hrang hrang atan inkalpawhna pawimawh zia chu Sawkarin a hria a, hemi atan pawh hma lak chhoh zel anih tur thu a sawi tel bawk.

State in hmasawnna a neih nan kut hnathawktute ngaihsak, humhim leh an hmanthatna te ngaituah a tul a tiin hemi kawngaMizoramBuildingand Other Construction Workers Welfare Board chuan an thawk tha hle a ni a ti, Larsap chuan.

Zirna chungchang sawiin Larsap chuan Zirna chu Sawrkarin a ngaipawimawh berte zingah a mi a ni zel dawn a ti. Mizoram in ziak leh chhiar thiamna lamah za zelah za  kan nih theih nan Lawngtlai leh Lunglei District-ah te Adult Education hnuaia Special Literacy Drive kalpui mek anih thu sawiin Zirna sang zawk atan ruhrel sak zawh leh sak mek engemaw zat a awm thu a tarlang bawk.

Chhiatrupna thleng thei laka inven leh inralrin pawimawh zia chu Sawrkar in a hria a,  hei hi dah pawimawh zel a ni tur thu a sawi bawk. Laipuitlang ah chhiatna thleng ah khan State Disaster Response Force te an thawk tha in an thawh hlawk hle a tiin Ministry hmasa ah State Disaster Management Authority thutkhawma chuan Armed Police Battalion zawng zawnga State Disaster Response Force Unit, company khat theuh dah a rem tih tawh thu a tarlang. Special Plan Assistance kaltlangin Ramhlun lei khi tih ziaawm nan hmalak a nih tur thu a sawi bawk.

Inrelbawlna thianghlim, felfai leh langtlang a awm zel theih nan Sawrkar chuan hma a lak zel tur thu sawiin Vigilance Department leh ACB chuan hemi kawngah hian hna an thawk zel a ni, a ti bawk. Departmental proceedings 947 siamfel tawh a, 206 chu hlemhletna kaihhnawih a nih thu leh chung zinga 110 chu an chungthu rel a nih tawh thu a tarlang bawk.

House Member (MLA) te mawhphurna chu khawtlang leh mitin huapzo tana hna thawh leh inpek a ni tih  hre reng thinturina chah a ni.

Mipui te chu Sawrkar thawhpui zel tura sawmin, Sawkar programme hrang hrangte chu tupui turin a chah a, Mizoram hi state hmasawn bera kan siam theih nan theitawp chhuah turin mitin te a ngen a, Krismas leh Kumthar duhsakna a hlan bawk.