February Ni 19, 2013 zing dar 04:00 leh dar 05:00 inkar vel khan heng a hnuaia hming tarlan mi pangate hi Chikha Khua, Mamit District atangin Tripura hei National Liberation Front of Tripura (NLFT) ten ruboin vawiin ni thlengin Bangladesh ram chhungah la hren an ni.
1. Vanlalfaka, Forest Department MR (BLFM Returnee)
2. Lalliansanga, Forest Department MR
3. Sangmawia, Forest Department MR
4. Vanlalruatkima (28) @ Nelsona s/o K. Thanzama (L) Hunthar Veng, Aizawl (JCB Operator)
5. Lalrammawia (22) @ Mawitea s/o K. Thanzama (L) Hunthar Veng, Aizawl (JCB Operator)
Rukbo an nih thu hi hemi ni vek tlailam dar 04:00 velah hriatchian a ni chauh a. He thil thleng hi Tripura State Special Branch-te hnen atanga hriat a ni a. An rukbona hmun tak hi hriat chian theih thuai a nih loh avangin Forest Department hotu lam te nen rang taka ngaihven anih hnuah Mizoram Police team ten a hmun hi tlawhin an hruaina lam hnu chhui zelin Bangladesh ramri thleng Police-te hian an umzui a. Hetih lai hian helte hi an mi rukbote nen Bangladesh chhung an lo lut hman tawh a ni. He thil thleng hriat chian a nih veleh hian CID (SB) team pawn thil thlenna hmun lamah tirh liam nghal an ni a, tin, SP CID (SB) pawh Tripura-ah a counterpart SP (SB) Tripura te nen meeting neiin he thil thleng chungchanga thu hriat dan te inhrilhin hma lak dan tur an sawiho a. Tripura State Special Branch-te hnen atanga hriat danin Tripura helpawl NLFT te hian nikum larn atang khan Mizoram Bru thalai Tripura refugee Camp a awm mek mi 15 atanga mi 20 vel training pe in an enkawl mek a. Pawl hming leh thiltum fumfe tak an neih hriat la nilo mahse NLFT te hian sum tuak nana mi rukbo hna an thawhnaah an hmang tangkai hle tih hriat a ni.
He inrukbona a inhnamhnawihte hi mi 10-15 vel nia hriat an ni a, khulai (Mizoram khawthlang lam leh Bangladesh inrina lai) vela an Area Commander ho a an thiltih niin a lang a, Bru NGO hrang hrangte leh Bangladesh-a Sazek tlang dung vela cheng NLFT be pawp thei tura ngaihte pawh tirin, sawrkar chuan hma a la mek reng a. Hetih lai hian rubotute hian February ni 21, 2013 zing dar 07:21 khan an rukbo chhungte mobile phone a rawn bia in an rukbo te tlannan Rs. Icrore an rawn phut a, hemi hnuah hian Forest Department a Wildlife Project Director-te pawh rawn be pawp in heng an thil phut chungchang te rawn thlenin leh rang taka hma lo la turin an rawn ti bawk a ni. Phone-a rawn betu hi Bru lama an mi hmante zinga mi” a ni a, March ni 6, 2013 khan rubotute hian Forest Department hotute hnenah deadline siam in nithum ral hmaa an pawisa phutte pe a an mi rukbote rawn tlanchhuak phawt turin an rawn hriattir leh bawk. Amaherawhchu, sawrkar chuan rukbote tlanchhuah nan hian . intiamkamna awm lova rawn chhuah thuai turin a duh a, hma a la mek zel a ni.
Tin, an mi rukbote an hrenna hmun hi ramdang (Bangladesh ram chhung) daih anih avangin sawrkar tan chuan Police Force-te hmanga chhanchhuah tuma hma lak chi a ni lova. Central sawrkara External Affairs Ministry lamah te he thil thleng chungchang hi hriattir a ni tawh a. Bangladesh sawrkar pawh hma la tura ngen turin Ministry of External Affairs-ah thlen a ni tawh a ni.
He thil thleng chungchangah hian NGO ten rukbote dinhmun hre renga an insumtheihna hi a chhuanawm kan ti a. Chanchinbu mi te leh media lama thawktute pawhin chi leh chi inkara boruak thalo thleng thei te hria a, he thil thleng chungchang chanchinbu leh TV kaltlanga puandarhna kawngah min fimkhur puina te avangin lawmthu ka sawi bawk a ni.
Tin, chak taka chhanchhuah hna Sawrkar in a thawh theih nan 22.2.2013-ah Honorable Home Minister, Mizoram Chairman-na hnuaiah ‘Crisis Management Group’ din a ni a, hetiang hian member ruat nghal a ni.
(a) Chairman - Chief Secretary, Mizora.
(b) Member Secretary - OSD, Home Department.
(c) Members -
(i) Home Secretary.
(i) DGP, Mizoram.
(ii) Addl. PCCF, E&F Department.
(iii) Joint Secretary, Home.
(iv) DC, Mamit District.
(v) SP, Mamit District.
(vi) SP,CID(SB).
He Crisis Management Group hian, din a nih atanga vawiin ni thleng hian ngaihtuahna tam tak sengin; rukbote himdam taka chhanchhuah an nih theih nan chak takin hma a la mek ni.
Heng thilthleng avanga sawrkarin chak zawk leh langtlang taka hma a lak theih nan Ni. 11.3.2013, chawhnu dar 1-ah Home Minister Chamber-ah Home Minister hovin Mizoram Kohhran Hruaitu Committee, Central YMA, MZP, MSU leh Hunthar Veng YMA Office Bearer-te’n NLFT thlazar hnuaia awm; hel chi khatin Mizo panga an rukbo chungchang sawihona neih a ni a. He thil duhawmlo tak thleng hian chi leh chi inkarah harsatna nasa zawk a thlen thei tih hrerengin, a rubotute hian an mi rukbote hi him dam tak leh rang takin, intiamkamna engmah awm lova chhuah vat turin an duhin an ngen a ni.
