1648/2023-2024

Dated Serchhip, the 25th August, 2023: Vawiin khan Serchhip DC leh DEO ni bawk Pu David Lalthantluanga hovin kumin inthlanpui lo awm tur thlir lawkna leh inbuatsaihna atan meeting pawimawh tak tak chhawng hnih neih a ni a. Election Commission of India tirhin Electoral Roll Observer Pu Lalzirmawia Chhangte, IAS chuan Serchhip District a tlawh a, meeting pawimawh tak neih a ni.

Pu Lalzirmawia Chhangte hova meeting-ah hian tun inthlanpui lo awm tur atana Special Summary Revision neih mek chungchang ngaihtuah ho a ni a. October ni 4 ah final roll hi tlangzarh a ni ang. Electoral Roll Observer chuan democracy tha taka a kal zel theihna atana pawimawh ber chu mipui ten an aiawhtu tur roreltu an thlanchhuah hi a ni, a ti a. Chu inthlan chu a thianghlim a ngai a, khua leh tui kum tling chin zawng zawngin vote an thlak theih nan electoral roll dik tak buatsaih chu ECI duhdan a ni a, khua leh tui ten an chanvo dik tak an chan theih nan voter tute mah hmaih loh tur tih hi ECI thupui a ni, a ti. Khawtlang hruaitute, political party te, MPF te leh NGO hrang hrang hruaitute chu khua leh tui, kum tling chin ten vote an neih ngei theih nan an pawimawh hle, a ti a. Mizoram chhungah hian Polling Station hmunhma leh election hmachhawn tura kan inbuatsaih dan a tha thin leh tiin Serchhipah pawh inbuatsaihna tha tak an nei nia a hriat thu meeting-ah hian a sawi a ni.

Sawrkar official te bakah Serchhip Sub-Headquarters YMA, MHIP, MPF, political party hrang hrang aiawhte leh MJA hruaitute he meeting-ah hian an tel a. Electoral roll chungchanga hriatbelh duh an neih te leh hriatthiam loh lai awm te inhrilhfiahna hun an hmang zui nghal a ni.

Meeting chhawng hnihnaah hian Serchhip District chhunga Department tin Head of Office te kohkhawm an ni a. Serchhip District chhunga Polling Station 88 - Serchhip Assembly Constituency ah 29, Tuikum Assembly Constitutency ah 32 leh Hrangturzo Assembly Constitutency ah 27 a awm a. Heng Polling Station-ah te hian ECI in a phut ang, voter ten tha taka vote an thlak theihna tura mamawh hrang hrang a awm kim em tih sawiho a ni. Sector Officer ten heng polling station zawng zawng hi tlawhchhuak tawhin report an thehlut tawh a. Heng report an thehluh te atang hian Polling Station tinah inkalpawhna kawng a tha em tih te, tui leh power supply a awm em tih te, wheelchair hmang te tana kalna tur ramp a awm em tih te, inbiakpawhna cell phone network a tha tawk em tih te leh pawimawh dang te an sawiho a ni.

Polling Station 88 zinga 80 hi School niin a bak 8 hi Community Hall a ni a. A vai hian a hmunhma hi sawrkarin a pawm vek tawh a. Voter ten harsatna awm loa tluang taka vote an thlak theihnan inbuatsaihna kalpui a ni. Inthlanpui chhunga Central Armed Police Force leh State Police te riahna tur pawh ruahman niin heng hmunah te hian tui leh power supply tha tawk tak pe tura ruahmanna siam a ni bawk.