Vawiin chawhnu khan Chief Secretary’s Conference Hall ah Japanese International Cooperation Agency(JICA) leh Mizoram sawrkar chuan tlangram lo neih hlawkzawk a kalpui dan leh thlai chawmtu tuihna hnianghnar zawka siamchhuah dan tur chungchanga ruahmanna “ the project on Capacity enhancement for sustainable Agriculture and irrigation development in Mizoram” tih JICA in a duan, kalpui turin thawhhona thuthlung “record of Discussions(R/D)” an ziak. R/D ah hian Mizoram aiawhin Chief Secretary Pu Lalmalsawma leh JICA aiawhin Pu Takema Sakomoto, Chief Representative, JICA India Office ten hming an ziak a ni.

Mizoram leh JICA thawhhona tura thuthlung felfai tak leh chipchiar tak puahchah a ni chu lawmawm a tih thu meeting kaihruaitu, Chief Secretary Pu Lalmalsawma chuan a sawi a. Kum 3 chhung teh meuh zirchianna atanga JICA in Mizoram Agriculture leh irrigation tihhmasawna tur a duangchhuak chu a fakawm a tih thu leh a rintlak tur thu sawiin Mizoram sawrkar aiawhin Japanese official te chu lawmthu a hrilh a ni. JICA India Office hotupa in Pu Takema Sakomoto pawh in Mizoram sawrkar nena thawhhona an nei thei tur chu an phur hle tih sawiin Mizoram chu an ram ang maia hmun nuam an tih thu leh an tlangnelna hmun a ni tih a sawi a. JICA leh Mizoram sawrkar thawhhona hnuaiah hian Japanese mithiamte chahchhuah an nih tur thu sawiin an ni chuan thingtlang loneitute thawhchhuah te tamtham zawka peipun a nih theih nan an theih tawp an chhuah dawn a ni a tiin Loneitute kaihruaitu department official te pawh uluk taka kaihhruai an nih tur thu a tarlang a ni.

“the project on Capacity enhancement for sustainable Agriculture and irrigation development in Mizoram”(PROJECT) hi Kum 2013 leh 2015 inkara Mizoram sawrkar leh Japanese International Cooperation Agency(JICA) mithiam ten ‘ the study on Development and Management of Land and water Resources for sustainable Agriculture in Mizoram” tih huang chhunga zirchianna an neih hmanga JICA in a duan chhuah a ni a. JICA leh Mizoram sawrkar thawhhona hnuaia Master Plan in hmalakna tur hmasa (pilot project) atana a thlanchhuah te chu - Bilkhawthlir, Aibawk, Serchhip leh Champhai te thlan an ni.