Mizo History Association chuan 24-25 November, 2011 chhungin I&PR Conference Hall, Aizawl-ah kumchhira an pawl intawhkhawm an neih vawi 31-na an hmang a; a ni hnihnaah hian Pu R. Romawia, Speaker, Mizoram State Legislative Assembly chu khuallian a ni.
Pu R. Romawia chuan, “History hi inchhuirilsiak zawnga kan kalpui chuan Mizoram leilung luahtu hnam hrang hrangte hi kan inthendarh thei a; historian-te pawimawhna chu hnam inpumkhatna zawnga kan thu-leh-hla kan ziak hi a ni. America ram pawh khu hnam chitinin an luah a, ram leh hnam tan lu-chhum ban-chhum an huam thung. Chuvangin, he kan ram neih chhun luahtute hi kan tanrual chuan Mizoram hi a dingchhuak chauh ang” a ti.
Speaker Pu R. Romawia chuan, “History hi a ziaktute azirin a danglam fo a; Mizo historypawh hi a huapzo zawng a kan ziah thiam a tul a ni. Thangtharte rilrua chi leh chi inlakbingna leh inhuatna rilru tuh zawnga ziak hi a himlo thei a ni” a ti bawk.
Mizoram History Association hi kum 1980 khan a lo ding tan a; tunah hian member nghet 183 an awm mek a ni. Vawiina an pawl inkhawmpui vawi hnihna hi Dr. JV Hluna chuan a kaihruai a; thupui thlanbik engemaw zat hmanga mithiamte thuziak zirho a ni. He hun puala an pawl lehkhabu buatsaih chu he inkhawmah hian Speaker Pu R. Romawia chuan a tlangzarhsak a ni.
