No.760/2020-2021

Tunlai hripui leng mek COVID-19 avanga Mizoram mi, Manipur a tangkhang mek Mizorama hruai luh hna chu ni 2 chhung kalpui a nih hnuah May Ni 1, 2020 zan dar 7:30pm khan zawhfel a ni ta. Heng hruai kir zawng zawngte hi an zavaiin mi 292 an ni a, an zinga mi 138 hi mipa niin, a dang 154 te chu hmeichhia an ni.

Mizoram sawrkar hmalakna kaltlanga tangkhangte hruaikir anih ni khatna April Ni 30, 2020 (Ningani) ah mi 153 hruai luh an ni a, heng zingah hian mipa 73 leh hmeichhia 80 an awm a. A ni hnihna nimin May Ni 1, 2020 (Zirtawpni) ah khan mi 139 hruai luh leh an ni a, an zinga 65 te hi mipa niin, 74 te chu hmeichhia an ni thung.

Ni hnih chhunga hruai haw zingah hian Aizawl District-a chengte tam berin mi 139 an awm a, Saitual district atangin mi 62, Kolasib district mi 40, Champhai 17, Khawzawl 10, Siaha 10, Hnahthial 8, Lunglei 3 leh Lawngtlai 3 an ni a, an zavai hian an mahni district theuha sawrkarin a ruat bik khunghranna hmun (Quarantine Centre) ah dah luh nghal vek an ni. Hruai haw zinga upa ber hi kum 84 mi a nih laiin, a naupang ber chu kum 1 mi a ni ve thung a ni.

Manipur atanga lo hawte hi Mizoram Sawrkarin anmahni hruailuhna tur atana a ruahman (entry point), Tuivai/Khawkawn, Saitual District atang veka hruai luh an ni a. Mizoram an rawn luh hma in Tuivai kam, Manipur ramchhung ni si-ah an chuanna Lirtheite chu hrithahna hmanga silfai (sanitise) sak vek an ni a, lo kir te kut silna tur buatsaih a ni bawk. Mizoram leilung an rawn rah veleh hian Doctor te'n an hriselna uluk takin an endik sak nghal a, entry point leh a chhehvelah hian social distancing dante pawh uluk taka zawm a ni.

Ngopa Civil SDO Pu Vanlaltanpuia chuan Manipur a tangkhangte Ni 2 chhung hruailuhna hun hman chhunga thawktute leh tlawmngaia pen chhuak zawng zawngte chungah lawmthu a sawi a. Mahni hna tul leh tihturte kalsana tangkhangte hlawhtling taka hruai haw an nih theihna tura Khawkawn VLTF leh Khawkawn YMA/MHIP member, a tul a piang thawka buaipuitute, venhim hna leh hnathawh viltu Saitual DSP (Hqtrs) Pu Denis Vanlallura kaihhruai Police team-te, Mizoram Sorkarin entry point a duty tura a ruat Medical Team Doctor 5 leh thawktu dang mi eng engemawzat, NE Khawdungsei PHC Medical Officer, Dr.Vanlalmuankima hova rawn thawhchhuak, medical screening hlawhtling taka hlenchhuaktute chu fakawm a tih thu a sawi a. A tul apiang thawka a hmuna thutchilhtu NE Khawdungsei VLTF te leh hruaikir hna thawh chhunga a hmuna hnathawh uap rengtu, Tuiphal Group YMA hruaitute chungah leh Manipur atanga lo haw, riltam em em te tana eitur chawhlui lo buatsaih saktu Ngopa VLTF-te chungah pawh lawmthu sawiin, an remhriatna leh midangte tana malsawmna nih duhna thinlung an pu chu chhuanawm a tih thu a sawi a. Ngopa Civil Sub-Division huamchhunga khaw hrang hrang VLTF hruaitute'n an khua-a tihtur awm hrang hrang - mikhual lo dawnsawn, khunghran ngai lo khunghran leh tul dang dangte thahnemngai taka an thawh avangin lawmthu a sawi bawk a ni.

Ngopa SDO Civil Pu Vanlaltanpuia chuan Manipur atanga haw hun bituk sawrkarin a siam niminah a tawp tak vanga haw hman ve lo an lo awm anih chuan sawrkarin remchang dang a ngaihtuah leh a rinawm thu a sawi a. Manipur nena inkalpawhna kawngpui pawh khar nghal anih thu leh sorkar atanga phalna nei tan lo chuan Manipura kal emaw, Manipur atanga lo luh emaw a theih rih loh thu Ngopa Civil Sub-Division chhunga mipuite chu hriattirin a ngen nghal bawk a ni.