No.6142/2020-2021

Aizawl, 16th October, 2020 : Nimin, ni15.10.2020 tlai dar 4.30 pm khan Mizoram Rajya Sabha MP Pu K.Vanlalvena chuan Union Minister of Defence Pu Rajnath Singh chu a chenna inah hmu in Defence Ministry hnuaiah emaw Home Ministry hnuaiah emaw Mizo Regiment emaw, Mizo Rifles emaw din turin a ngen.

Pu Vena chuan Mizo te chu pi leh pu hun lai atang tawha hnam huaisen leh indo mi kan ni, tiin Pu Rajnath Singh hnenah hian a sawi a. British sawrkar in India, Bangladesh leh Pakistan te awp tur chuan silai vawi khat pawh a hmeh puah loh laiin Mizote awp tur erawh chuan British sipai leh officer ten nunna an chan a. Hun rei tak chhung Mizo leh Bristish te chu indovin Mizo lal pahnih Pu Dokulha Chinzah leh Pi Ropuiliani te phei chu an thih ni thlengin British hoin Lung Inah an khung a ni, a ti a.

Mizo tlangval tam tak ten Sipai tan hi an duh ber a nih avangin Assam Regiment leh Assam Rifles ah pawh Mizo tlangval tam tak an tang mek a, tuna tang mek aia tam zawk daih hi sipaia tang duh Mizo thalai an awm thu leh, police sang khat vel lak turah pawh Mizo tlangval sing li chuang an intlar a ni tih Defence Minister hi a hrilh a.

Mizo Regiment emaw Mizo Rifles emaw din a nih chuan India in Regiment a neih tawh zawng zawnga huaisen leh discipline tha ber an nih theih a rin thu te, International boundary KM 720 a thui in min hual vel avangin Mizo Regiment emaw Mizo Rifles emaw din chu a tul thu leh hei hi Mizo thalaite eizawnna atan chauh ni lovin India ram himna atana thil pawimawh tak a nih thu a sawi bawk a ni.

Pu Vena chuan Mizo Rifles emaw Regiment emaw din theih a nih chuan an Hqrs thuthmun leh training centre atan Mizoram chhunga Assam ramri ah Inner line Forest Reserved zau tak an neih thu leh hei hi tih hlawhtlin a nih chuan Mizoram sawrkar tan Revenue hnar tha tak a nih tur a thu pawh a thlen bawk.

Pu Rajnath Singh pawhin Mizoram MP Pu Vena thu thlen chu thil pawimawh tak a ni tiin uluk taka ngaihtuahna hmang chungin an lo enzui dawn tih a hrilh a ni.

Attachment

  • Loading attachment...