Mizoram Pharmacists’ Association te chuan kum 50 an tlin chu kumtluana lawm turin vawiin khan I & PR Auditorium-a inkhawm buatsaihah a lawmtan hun chu Parliamentary Secretary (Health) Pu S. Laldingliana hovin an hmang.
Jubilee lawmtanna inkhawm hi an pawl President leh Zofate zinga Pharmacy a Master Degree leh Doctorate Degree hmu hmasa ber Dr. H. Lalhlenmawian a kaihruai a ni. Hun hmanpuitu Parliamentary Secretary Pu S. Laldingliana chuan tihdam rawngbawlna hi rawngbawlna zawnga ropui ber anih thu sawiin Pharmacists rualte chu tunlai khawvel leh abikin Mizoram-in damdawi hmansual boruak rip tak - muthlum chungchang an tih mai hmachhawn tur hian mawhphurhna sang tak an neih thu leh an pawimawh zia hriaa he thil sual lian tak dolet tur hian nasa lehzuala tanla turin a fuih a ni.
Pu S. Laldingliana chuan sum harsatna karah Health Department chhunga Pharmacists te thil mamawh leh indaih lohna hrang hrangte chu theih tawp chhuaha chin fel mek an ni a ti a. Kum kalta chhung khan Pharmacists 15 lai a ngheta lak an ni nachungin PHC leh CHC ah duh anga la dah kim theih an nih loh avangin pawi a ti a. Harsatna hrang hrang karah pawh theih tawp chhuahzui tum a ni, a ti. Referral Hospital pawh khum 170 emaw leka bultanin khum 300/400 awm theihna tura tih changtlun te, helai hmun hi Mizoram Medical College atana buatsaih chhoh zel tum anih dan te a sawi a. Mizoram State Pharmacists Council ten sorkar laipui atanga sum thahnem tak hailut tura hma an lak mek chungchangah te pawh a theih ang apianga bawhzui pui a inhuam dante a sawi a ni. RIPANS tih changtlunna tur pawhin tunah hian DPR buatsaih mek a ni, Pu Laldingliana chuan a ti bawk.
Parliamentary Secretary hian MPA dinchhuaktu zing ami Pu Sanglura Sailo lehkhabu ziak Mizoram Pharmacists te chanchin tih chu a tlangzarh nghal a ni.
Thusawitu dang Mizoram State Pharmacists Council aiawh leh Deputy Drugs Controller Pu Lalsawma Pachuau chuan Mizoram in drug policy thar nei tura hma a lak mek thu leh sorkar laipuiin CSS hnuaiah cheng vaibelchhe 3200 lai a ruahman zinga a tam thei ang ber Mizoramin hailuh ve tuma hma a lak dante sawiin Parliamentary Secretary tanpuina a sawm nghal a ni.
Mizoram Pharmacists Association hi kum 1963 February 11 khan Mizoram Pharmacists Union ti a din tan a ni a. Tunah hian Mizoram Pharmacists Association tih hmingpu in Mizoram pumah member 339 an awm mek a, member hian sorkar department hnuaia Pharmacists thawklai mek leh chawl tawh te, Pharmacy zirlai mek leh zirtirtute bakah damdawi zuar thahnem tak an tel a ni.
Golden Jubilee hi kumtluana lawm tum niin essay inziak siak te, seminar leh workshop te neiin kum tawp lamah hlung taka kharna hun hman tum a ni bawk.
