Social Media a Myanmar atanga COVID-19 vei Mizoram lama luh tum an awm anga thu thang diklo thehdarh chungchangah Mizoram police chuan a hnuai ami ang hian thuchhuah an siam.
Ni 6.04.2020 zan dar 10 PM vel khan Social Media Whatsapp-ah hetiang hian thu a darh a, "Myanmar ram chikha khua a mi 2 positive china a tranga rawn haw chu an khan atrangin a tlan bova, mizoram ah rawn luh an tum tih hriat a ni a, a bik in Burma ramri a awm te i fimkhur zual ang u." ti in. He thu hian mi tam tak rilru a ti mangang a, hei vang hian Mizoram Police ten chhui nghalin hetiang hi thil awmdan a ni.
• Hrianghmun khaw mi pakhat hian Dt 4.4.2020 khan lova a fehna atangin apu Chikha ami a han bia, a pu hian "Chikha mi pahnih drug addict chu an khua a rawn haw lovin an awm a, Mizoram lama an rawn kal palh takin lo fimkhur rawh u. Covid-19 pawh an vei lovang tih a hriat loh", tiin a chah a.
Ani hian hian nimin Dt.6.4.2020 khan Hrianghmun YMA Br Secretary a hrilh in information mike-ah thil dang an au pahin mikhual neilo tur leh fimkhur a ngaih thu an au tel ta a ni.
He information hi chiang vak lova hriain SSA zirtirtu pukhat, Sialkal Group YMA Finance Secretary leh Hrianghmun Branch YMA Executive member chuan tikhian a lo post ta ani.
An pathum hian Ngopa PS ah Dt.7.4.2020 zingkar khan an statement lak a ni a. He thu post darhna a mawhphurtute hi khawtlang tan pawh a mi tangkai prominent citizens an ni. He thu Social media a tidarhtu ber Hrianghmun khua kum 36 mi lakah hian Ngopa Police Station Case No. 2/2020 Dt.7.4.2020 u/s 505(1)(b) IPC R/w 54 of the Disaster Management Act 2005 thubuai siamsak a ni.
Mipui rilru a dik lo zawnga hruai thei leh mipui tichiai a thu dik tluantling lo leh thu belhchian dawl lo thehdarh hian nghawng tha lo tak a nei thei a. Mipui te i fimkhur tlang theuh ang u.
