Mizoram Police leh State Bank of India chuan vawiin khan Arya Mess, Khatla-ah Police Salary Package (PSP) atan Memorandum of Understanding chu he huna khuallian Parliamentary Secretary Lt. Col.(Rtd.) Z.S. Zuala hriatpuina hnuaiah an ziak a. MoU hi Pu Zorammawia, Inspector General of Police leh Pu Panna Lal Das, General Manager (NW-II), SBI, North East Circle ten an sign a ni.

Parliamentary Secretary Lt. Col.(Rtd.) Z.S. Zuala chuan Mizorama bank rinkai ber te zing ami SBI nena thawhhona thuthlung ziah ani chu lawmawm a tih thu sawiin, Mizoram Police-te tan hamthatna tam tak a thlen ngei a beisei thu a tarlang a. Police-te tan an hna hian an nunna tan a hlauhawm thei tam tak a keng tel a, He Police Salary package hian accident-a nunna hloh te tan pawisa claim theihna “accidental insurance cover” a keng tel chu lawmawm a tih thu a sawi a. Sum enkawlna kawngah pawh thui takin a tanpui a rin thu a sawi bawk a ni.

He hunah hian IGP Pu Zorammawia leh Pu Panna Lal Das, SBI General Manager (NW-II)-te chuan thu an sawi bawk a. Police Department leh Bank in thawhhona tha tak an neih chhoh zel an beisei thu an tarlang a ni. MoU ziahna pual inkhawm hi Pu H. Lalhlimpui, Deputy Manager, SBI, RBO in kaihruaiin, Pu Dijen Bora, Chief Manager, SBI, Guwahati hnen atangin he Police Special Package chungchang sawifiahna ngaihthlak a ni a, kalkhawmte zawhna an chhang nghal bawk a ni.