No.6584/2020-2021
Dt. 16.11.2020 tlai dar 7:00 p.m. vel khan Non-Mizo driver pakhat chu Lalthanzaua Filling station bulah tleirawl thenkhatin kut an thlak tih report Sairang Police station-ah dawn a ni a. Hemi chungchang ngaihven a chhuizui tur hian kut inthlakna hmun panin Police an kal nghal a. Hnamdang driver pakhat, Bobidul Haque (21) S/p Kasim Ali, Tukra Part II, Goalpara District, Assam, bungraw phur thin motor number HR55-M-2648 khalhtu chu tleirawl mi panga (5) in a motor chhungah kut an lo thlak avangin hliam a tuar tih hmuh a ni a, Sairang PHC ah kalpui niin a hliam hi ‘simple injury’ a ni a, a hliam enkawl a nih hnuah damdawiin atangin chhuahtir leh a ni. Hnam dang driver kut thlaktu nia puh mi panga (5) te hi Breath Analyzer Test hmangin endik an ni a, zu an in vek a ni tih hriat a ni. He kut inthlak thuah hian kut tuartu thawhpui Mizo driver-in complaint a thehluh milin Sairang Police station-ah case no. 25/20 Dt. 16.11.2020 U/s 447/323/34 - IPC r/w 6(3) MLP Act thubuai ziahluh a ni a, kutthlaktu mi panga(5) te hi man niin Judicial custody-a awm turin Court-ah thawn an ni. Hnuchhui hna kalpui mek a ni.
Hetianga kut inthlak hi thil pawi tak leh na taka hrem theih a niin, chi leh chi inkar remna leh muanna thlenga tichhe thei a nih avangin Mizoram Police chuan mipuite, a bikin thalaite hetiang thila inhnamhnawih lo turin a ngen thar leh a, dan zawm lote chungah dan angin a tul anga action lak zel a ni ang.
