No.3910/2020-2021

Mizoram Police chuan an thu dawn bawhzuiin Dt.4.8.2020 khan dan lova mi bank account lei khawm a, LIC Agent anga inchhal mi pahnih, hmeichhia kum 32 mi, Kolasib College veng P/A Kulikawn Zobawm veng, Aizawl leh mipa kum 21 mi, Lunglei Zotlang te chu an man a. Anni pahnih hian mi bank account lei khawmin an leikhawmte hi hnamdang hnenah hlep neiin an hralh chhawng leh thin tih hriat a ni.

Mizoram Police chuan an mi man pahnihte hnen atang hian Bank hrang hrang Pass Book – 40 nos. ATM Card – 10 nos. Cheque book – 13 nos. Mobile SIM card hrang hrang – 22 nos leh pawisa fai Rs. 24,000/- (Cheng zanga notes) an man bawk. Heng mi pahnih mante hi dan angin Kulikawn PS Case No.76 Dt.4.8.2020 u/s 120 ‘B’/419/420 IPC criminal case siamsak an ni.

Heng bank account hralhte hi misual (online-a mi bum hmangte) kutah lutin, misualte hian mi an bum hnuah an pawisa bum chhuahsakte chu chung bank account-ah chuan dahin a remchan ang angin an hmansak tawh mai thin a ni. Chutiang case chu chhui a lo nih in, bank account neitute chhuichhuah an lo ni ta thin a, criminal case hial an lo awrh palh thei a ni. Chumi avang chuan hetiang lamah hian mipuite fimkhur ila, kan bank account, Passbook, ATM card leh a kaihhnawih thildangte tu hnenah mah hawhtir emaw hralh lo turin kan inngen a ni.