Mizoram Range Assam Rifles, 23 Sector Assam Rifles ti a hriat ni bawk chuan naktuk September ni 10, 2010 hian India ram venghim tura a thawh kum 50 na champha phak a thleng dawn ta. Mizoram Range Assam Rifles hi September 10, 1960 khan Silchar-ah din a ni a, Colonel J.D.Nadirshaw, VRC, SC chu Deputy Inspector General hmasa ber niin, he unit thar hi Mizoram, Manipur leh Tripura ah te chhawr nghal a ni. He Range hi din anih veleh an huam chhung State hrang hrangah hna an thawk nghal char char a, kum 1962 a India leh China an indo tum phei chuan a tul ang ang thawk turin Mokukchung, Nagaland ah an insawn hial a ni. March, 1966 a Mizorama rambuai a intan khan he Range hi Mizorama insawn tur a tih a nih angin rang takin March 21, 1966 khan Aizawlah an insawn nghal a ni. Kum 1972-a Mizoramin UT a hmuh khan, Mizoram Range Assam Rifles chuan Lunglawn/Lungleiah Headquarter thar dinin hemi kum vek November thla khan an insawn a, engemaw chen an va awm hnuah kum 1978 September ni 15 khan tuna an awmna Aizawlah hian an insawn kir leh ta a ni.

Assam Rifles Range leh Batallion te hian Indo-Myanmar border (India leh Myanmar ramri) ah boruak tha a awm theih nan leh ramri a lo him theih nan uluk takin an vil reng a, an thulaimu "Tlang mite thian" tih chu chang chawiin Mizoram Sawrkar leh mipuiten an mamawh hun apianga tanpui var turin an in kau reng a ni.

He an kum 50-na lawmna atan hian mipuite tan August ni 28, 2010 khan AR Lammualah Mass Band Display leh Dog Show neih a ni a, September ni 4, 2010 khan Central YMA Platinum Jubilee leh Assam Rifles Golden Jubilee lawmna chikhat atan Jubilee Marathon Assam Rifles leh CYMA tangkawpin an buatsaih a, September ni 6, 2010 khan AR Ground ah Mela ropui tak huaihawt a ni bawk.