DIRECTORATE OF INFORMATION & PUBLIC RELATIONS, Government of Mizoram, India

1959/2022-2023

Nimin ni 16 September 2022 chhun dar 12:00 noon khan MRB Branch 101 na chu Tawipui South ah Lunglei Bawrhsap Pu Kulothungan A, IAS in a hawng.

Branch hawn inkhawm hi Pu V.L. Zahawma, Regional Manager, Network - II in a kaihruai a. Rev. T. Hmangaih Vulliana, BCM Tawipui South Bialtu Pastor-in hunserh a hman hnuin Khuallian Pu Kulothungan A, IAS, Lunglei Bawrhsapin thu sawiin Mizoram Rural Bank in Branch 101 hawng theia an awm chu a lawmpui thu a sawi a. Tunlai khawvel thang zelah Bank a pawimawh tial tial thu te leh Tawipui South tana Branch a awm theih nana theihtawp a lo chhuahpuiziate a tarlang a, hetianga Bank hawn a lo nih takah chuan tangkai taka hmang turin mipuite a sawm a ni.

Pu V. Jaya Chandra, MRB Chairman pawhin thu sawiin, Mizoram Rural Bank in Branch 101 na an hawng thei ta chu lawmawm a tih thu a sawiin MRB chu Mizoram chhunga inzar pharh zau ber Bank a nih thu a tarlang a. MRB hian Mizote khawsak dinhmun chawikan chu an tum lian tak anih thu leh chumi atan chuan hmun kilkhawr ber berah pawh Branch an hawn bakah tunlai thiamna sang zel mila Bank pawhin hma a sawn zel thute, Mizorama loan pe chhuak hnem ber Bank an nih thu leh MRB hi Bank rintlak leh Mizote ta anih anga tangkai taka hmang turin Tawipui South khaw mite leh a chhehvel khuaa awmte a sawm a ni.

MRB Tawipui South hi Tawipui South khua bakah Mualcheng, Thualthu, Tawipui N-I, Tawipui N-II, Thingfal, Mamte leh Thlengang khuate tana chhawrnahawm tak anih beisei a ni a. Heng khaw hrang hrang aiawh hian Pu C. Vanlalruata, VCP, Tawipui South pawhin Branch hawn anih avanga lawmthu sawiin he Branch - ah hian tumah inthlahrung lova dawr turin a sawm nghal bawk. Anni bakah Tawipui South VCP kalchhuak ta, Pi Laltlansangi'n Tawipui South khuaa Bank lo awm theih nana an hmalak tawhnate leh Pi Lalremsangi, Lunglei leh Hnahthial District LDM ten mipuite tana Bank tangkainate leh hma an sawnpui theih dan tur an sawi bawk.

Branch hawn tharah hian Pu John Lalchhanhima Ralte, Branch Manager leh Pu V. Lalremkima, Office Assistant te thawktu hmasa tur an ni ang.

Attachment