Vawiin khan Chief Secretary Pu Vanhela Pachuau IAS chuan Mizoram Rural Bank (MRB), Branch 64-na tur PUC Campus Branch, College Veng, Aizawl chu a hawng.  

Pu Vanhela Pachuau chuan Mizoram Rural Bank hi Sorkar in a chhawr tangkai hle a, mipui pawhin an chhawr tangkaiin nasa leh zual a tangkaipui thei turin loan lak te rul tha ila, ringtu kan nihna ang pawhin kan rulh that a tul a ani a ti. He hunah thusawitu dang, Mizoram University Vice-Chancellor Prof. Lalthantluanga chuan Mizoram tana micro-finance hmanga hna an thawh te fakawm a tih thu leh he Branch thar hi College veng leh a chhehvel veng zawng zawng ten hmang tangkai se a duh takzet thu a sawi.

Mizoram Rural Bank Chairman Bhupen Deka chuan MRB hian tun hnai lawk ah Hnahlan ah Branch thar an hawn leh tur thu leh ATM facility pawh an ti thei tep thu a sawi a. Sorkar kum 2012 -2013 ah hian ATM khawl 20 hawn hman an tum tih Chairman hian a puang bawk.