No.5665/2020-2021

Vawiin tlai Dar 4:15PM khan Deputy Chief Minister Pu Tawnluia chu ASSOCHAM (Associated Chambers of Commerce of India) buatsaih, ‘Emerging North East-Smart Solutions’-ah khualzahawm niin he hunah hian video conference kaltlangin thu a sawi.

Deputy Chief Minister Pu Tawnluia chuan Shri Dr. Jitendra Singh, Minister of State, Ministry of DoNER chungah lawmthu sawiin, khualzahawm tura sawm a nih chu lawmawm a tih thu a sawi a. Khualzahawm chuan Mizoram chu Southeast Asia ram hnaia awm a nih avangin, India tan state pawimawh ber te zinga mi a ni, a ti a. Mizoram chuan tunhnaiah hmasawnna tam tak a nei a, chung zingah chuan NITI Aayog in Kum 2019, June thlaa Health Index a tihchhuah-ah Mizoram chu India ramah a sang ber dawttu niin, tehna hrang hrang atanga state hrisel leh hnathawk thei tam tak awmna a ni tih a entir a ni, a ti a. Kum 2018-2019 inkara Gross State Domestic Product (GSDP) chu 13.04% a ni a, kum 2018-2019 chhunga state per capita income chu Rs 1,68,626 a ni bawk a, India ram per capita income chawhrual aiin a sang a ni, a ti a. NITI Aayog buatsaih, Export Preparedness Index, 2020-ah Mizoram chu 23 na niin, Department for Promotion of Industry and Internal Trade (DPIIT) in a tarlan danin Mizoram chuan Foreign Direct Investment (FDI) ah April, 2000 atanga March, 2019 chhungin US Dollar 116 million a chhunglut a ni, a ti a.

Deputy Chief Minister Pu Tawnluia chuan Mizoram chu hmarchhak state atanga thei tharchhuak tha state niin, Mega Food Park pawh hawn a ni a, Agriculture leh Horticulture crops-ah nasa takin hma a sawn a ni, a ti a. Mizoram sawrkar chuan UN Sustainable Development Goals leh Mizoram Vision 2030 hlawhtlin nan hma ala zel a ni, tiin a sawi.

Emerging North East Smart Solutions hi session hnih-a then niin, session khatna-ah hian NABARD Managing Director Pu SN Mallick leh CEO Oil Palm Plantation, Godrej Agrovet Pu Nasim Ali leh midangte hnen atangin thusawi ngaihthlak a ni a, Session hnihna-ah Sikkim State atangin ASSOCHAM Report tlangzarhna hun hman a ni a. Chairman IIA, Jharkhand ASSOCHAM Skill Council Dr. Sumit Suseelan leh midangte hnen atangin thusawi ngaihthlak a ni.