1509/2025-2026

Aizawl dated 19th September 2025: Vawiin khan Dr. KC Lalmalsawmzauva, Adviser to Chief Minister leh Vice Chairman, Mizoram State Policy Coordination Committee chuan Mizoram Sawrkar Flagship Program 'Bana Kaih Scheme Phase II' chu Irrigation & Water Resources Department Auditorium-ah a tlangzarh a. Pu Lalmalsawma Pachuau, Secretary, Planning & Programme Implementation Department chuan Bana Kaih Scheme Phase-I kalpui chhunga hmalakna hrang hrang tarlanna hun a hmang a. Pu VL Zaithanzama, MLA, Pu Lalchhuangthanga, MLA, Dr. Kenneth Chawngliana, Vice Chairman, State Planning Board, Mizoram State Policy Coordination Committee member-te he hunah hian telin Implementing Department 19 atanga Nodal Officer-te, Partners Bank aiawhte leh Bana Kaih Scheme Phase -I a Progress Partner sawm bikte an tel bawk a ni.

Dr. KC Lalmalsawmzauva, Adviser to Chief Minister leh Vice Chairman, MSPCC chuan Bana Kaih Phase -II tlangzarhna ah hian, Mizoram Sawrkar Flagship Program 'Bana Kaih Scheme Phase -II' hnuai ah hian khawpuia cheng, thiamna leh theihna neisa, bultan tumte leh hmalak tawhna tih changtlun tumte kaih chhuahna tur Loan Component-a awm bakah, kuthnathawktute kaih chhuahna tur 'Market Handholding Support' a awm bawk avangin, mi taima leh tumruhte tan ram tih hmasawnna tura hmanraw tangkai tak a nih thu a sawi a. Bana Kaih Scheme hnuaia Loan Component leh Chief Minister's Special Package-te hi a thlawna sem a nih loh thu sawiin, hnathawk tura inpeih te, theihna leh thiamna nei te, ram tih hmasawnna tura Sawrkar thawhpui tlaka ngaih te hnena tanpuina a nih thu a sawi.

Dr. KC Lalmalsawmzauva chuan Bana Kaih Scheme chu, a pung Sawrkarin a rulhpui tura loan pek chhuah leh kuthnathawktute thlai thar lei sak mai bakah hmasawnna tak chang tura taimakna, tumruhna leh rinawmna nei tura inzirtirna (Moral Reforms) te, sum enkawl dan tha (Financial Literacy) inzirtirna te, Internet hman tangkai inzirtirna (IT Literacy) te leh eizawnna rintlak dinna tur ruhrel tha siam te a ken tel thu a tarlang a. Tanpuina dawngten hlawhtlinna an chan ngei theihna turin, an hmalakna kalpui dan en zui tur, 'Monitoring Team' ten uluk takin an vil zui zel tur thu a sawi.

MSPCC Vice Chairman chuan Phase –I kalpui chhung khan kuthnathawktute hmalakna a zarah, buaipui tham Sawhthing thar chhuah a ni chu hmasawnna entirna a nih thu sawiin, Sawhthing lei nan cheng Vbc. 95.63 pek chhuah a nih thu a tarlang a. Kan thlai thar chhuahte man man zawka tih ral a nih theih nan rel lo lute pawh hman tangkai a pawimawh thu a sawi.

Pu Lalmalsawma Pachuau, Secretary, P&PI Department tarlan danin Bana Kaih Scheme Phase -I kalpui chhung khan Loan Component dilna 11,439 dawn atangin 702 chu loan dawng tura pawm a nih tawh thu a sawi a. Heng loan pek tura pawm tawh zawng zawng belh khawm hi Vbc. 76.35 niin chawhrualin mi phakhat hnenah loan hi Cheng 10,87,000 ang zela pek chhuah tur a ni. An dilna bank azirin tunah hian loan hi sem chhuah mek a ni a, PMEGP portal siamthat avangin loan pek chhuah hi a khawtlai phah thu a sawi. Phase-I ah khan Chief Minister's Special Package diltu mi 29,571 te dilna chu a changtu department-a thawktuten uluk taka an endik hnuah, mi 2,258 te hnen ah pek a ni a. Sum pek chhuah belhkhawm hi Cheng Vbc. 18.33 a ni. He huna tarlan danin Bana Kaih Scheme Phase-II ah hian Implementing Department 19 an awm tawh dawn a, dilna felfai taka thehluh a nih theih nan DPR Software siam a ni tawh a. Mi tam zawkin tangkai taka Bana Kaih Scheme hi an hmalakna tih changtlun nan leh tihhmasawnna atana an hman theih nan Chief Minister's Special Package chu Cheng 50,000 thleng pek theih tura thlak danglam a ni bawk.

Bana Kaih Scheme Phase - II tlangzarhna hun ah hian Horticulture department hnuaia Progress Partner 8 thlanchhuahte hnen ah Market Handholding Support kaltlangin Sawhthing her sawmna khawl hlan a ni a. Phase II kalpui chhunga dilna thehluhna tur Online Portal zirchianna hun hman niin Progress Partner dilna endiktu tur 'Search Team' te mawhphurhna hrang hrang inhrilhhriatna hun hman niin I&PR Department buatsaih, Bana Kaih Scheme Phase-II hrilhfiahna Video thlir ho a ni bawk. Vawiin hun hi Pi Emily Lalrinpuii, Deputy Director, I&PR Department chuan kaihruaiin Pu Lalchhuanawma Hrahsel, Member, MSPCC chuan lawmthu sawina hun a hmang a ni.