No.1156/2020-2021
Disaster Management Act, 2005, Section 22(2)(h) & 24(1) in thuneihna a pek angin vawiin tlai khan Mizoram Chief Secretary Pu Lalnunmawia Chuaungo, Chairman, State Executive Committee, State Disaster Management Authority chuan hetiang hian thupek a ti chhuak.
Mizoram Sawrkarin 02.05.2020-a inkhuahkhirhna dan a siamte chu a hnuaia tihdanglam ang hian 18.05.2020 atangin 31.05.2020 thleng kalpui tur a ni. He thupek hian a hma-a lockdown kaihhruaina No.B.13021/101/2020-DMR/Pt-III dated 02.05.2020 a thlak (supercede) ang.
A. International & Inter-State Border
1. International border chu khar chhunzawm a ni ang.
2. Inter-State border khar mekte chu khar chhunzawm an ni ang.
3. Bairabi, Vairengte leh Kanhmun kaltlang kawngpuite erawh chu essential commodities bakah Home Department-in a phal bungraw dang phur lirtheite tan hawn a ni ang. Mipui zin veivahna lirthei erawh chu Home Department phalna neite tan lo chuan khap tlat a ni.
4. Ramri (International leh inter-state) leh ramri dep khuaah te khauh (strict) taka duty chhunzawm zel a ni ang.
B. Mizorama lo lut tur screening leh quarantine chungchang
1. Mizoram Sawrkar phalna nei lo Mizoram-a luh chu khap tlat a ni.
2. Phalna neia Mizoram-a lo lut reng reng chu entry point-a screening centre-ah uluk taka screening kalpui chhunzawm zel a ni ang. Ni 14 chhung emaw Sawrkarin tul a tih chhung an inkhunghrang (quarantine) tur a ni. Mizoram mi leh sa, lockdown avanga State pawna tangkhangte lo kir leh dan tur ruahhmanna chu “Covid-19 Lockdown avanga Mizoram mi leh sa, Mizoram pawna tangkhangte lo haw dan tur kaihhruaina (Standard Operating Procedure)”-in a sawi angin kalpui a ni ang.
3. Quarantine tura tih reng rengte chu mCOVID-19 leh Aarogya Setu mobile application hmangin an in-register vek tur a ni.
4.Driver leh handyman te, Mizoram pawn atanga bungrua la-a zin te chu Sawrkar quarantine facility-ah an khawsa ang a, bungraw lak hna an thawh chhung chu midang nen intlawhpawh lovin quarantine facility atangin an thawk ang a, load an lak hnuhnun ber atanga ni 14 hnu-ah an in lama haw phalsak an ni ang. Quarantine facility-a an awm chhung hian an chhungte leh midang tlawhpawh phalsak an ni lovang.
5. State pawn lam lirthei driver leh handyman, phai atanga bungrua rawn thiar lut thinte chu an kalphung pangngai angin khaw daiah anmahniin eirawng an inbawl chawp ang a, khawchhungah midang nen inchiahpiah lovin an bungrua an unload zawh veleh an let leh nghal ang. An bungrua unload chhung hian midangte atanga feet ruk (6) tala hla-ah an awm tur a ni.
6. All Mizoram Petroleum Dealers Association (AMPEDA) leh Mizoram Tanker Drivers Association (MTDA) hnuaia tanker driver leh handyman, Mizorama khawsa te, Mizoram pawn atanga oil phur lut te reng reng chu an oil phurh an unload hnu ah Vairengte-a an awmna tur ruahmanah an khawsa ang a, hemi hmun atang hian chhungte nena intlawhpawh lovin load an thiar thin ang.
7. A chunga tarlan driver leh handyman-te hian kawng laka harsatna an tawh thulhah State Control Room (Toll free 1070, landline 0389-2335842/2335837 leh mobile 9366331931)-ah phone-in an harsatnate an thlen thei ang.
C. Bungraw chawkluh leh thiar chungchang
1. State pawn atanga bungraw lakluh theih zingah nitin mamawh (essential commodities)-te chu phalna hranpa lak ngai lovin lakluh theih a ni ang. Heng bakah hian bungraw dang (non-essential commodities), Home Department-in a phal te chu, phalna hranpa lak ngai lovin lak luh theih a ni bawk ang.
2. Bungraw lalut tur reng reng chuan mCOVID-19 mobile application-a mPass hmangin emaw entry point-ah ziakin, declaration an thehlut ngei ngei tur a ni.
3. Home Department phal zing ami ni lo bungraw dang (non-essential commodities) la lut turte erawh chuan mCOVID-19 mobile application-a mPass hmangin Home Department phalna an la hmasa tur a ni.
4. Mizoram chhung bika bungraw phurh leh thiar te tan phalna hranpa lak a ngai lovang.
D. Dawr leh sumdawnna hmun
1. Dawr, sumdawnna hmun leh eizawnna kawnga hmalakna te chu ‘Standard Operating Procedure (SOP) for Social Distancing’ Attachment-1 a tarlan zawm chungin kalpui tur a ni.
Aizawl Municipal Area chhung leh District Headquarters chhung bikah, hmun lunlai/dawrkawna dawr leh shopping complex/mall chhunga dawr inthenawm te chu nikhat kar danah an inhawn chhawk ang. A ni zawnin dawr pakhat inhawn phal a ni lo. Dawr inthenawmte nikhatah a rualin inhawn phal a ni lo. Hei hian zirlaibu zawrhna dawr, mihring leh ran damdawi dawr leh clinic-te a huam lovang. Hemi atan hian Deputy Commissioner te’n ruahmanna an siam ang.
2. Khaw dang zawngah chuan dawr leh sumdawnna hmunte dan pangngaia hawn phal a ni. Amaherawhchu, Deputy Commissioner tin ten tul an tih angin kaihhruaina/khuahkhirhna an siam thei ang.
3. Mipui mimir-in awlsam taka thlai leh chawhmeh an hmuh theih nan veng hrang hrangah LLTF/VLTF ten chawhmeh zawrhna tur an ruahman ang.
4. Chawhmeh, thlai leh theite, in lama pek (home delivery) phal a ni.
5. Public park, picnic spot, movie theatre, gym, spa, beauty parlour, community hall, bazarpui leh intawllenna hmun zawng zawng chu khar chhunzawm tur a ni.
6. Tuallai leh kawtthlera thil zawrh (street vending) khap tlat a ni.
7. Dawr zawng zawng (damdawi dawr tiam lovin) chu tlai dar 5:00-ah khar vek tur a ni.
8. Mizoram-a khualzin cham mekte Hotel-ah thlen phal a ni a. Mikhualte tana ei leh in buatsaih pawh phal a ni. Amaherawhchu, pawn lam mi (hotel-a thleng mikhual ni lo)-te an dawngsawng tur a ni lo.
9. Restaurant hawn phal a ni lova, home delivery erawh phal a ni ang.
E. Zirna in, sakhaw biakna hmun leh mipui punkhawmna hmun te
1. Zirna in, training institute leh sakhaw biakna hmunte chu khar chhunzawm zel a ni ang. Amaherawhchu, hei hian an administrative office hna pangngai kalpui erawh a huam lovang.
2. Mipui punkhawmna, heng - inneih lawmna (reception), lungphun, anniversary leh birthday lawmna, games & sports, book release, politics leh pawl thila kalkhawmna, intihhlimna ang chi reng reng - te chu he hun chhung hian huaihawt phal a ni lo.
3. Inneih inkhawm leh mitthi vuina-ah mi 20 aia tam punkhawm khap a ni.
F. Zin veivah leh mipui chet vel chungchang
1. Mizoram chhung khaw kar kawnga passenger phur lirthei (commercial passenger vehicle) leh town/city bus, taxi, auto rickshaw leh two-wheeler taxi te chu tlan phalsak an ni ang. Hengah te hian registration-a seating capacity tarlan bak chuan phal a ni lo. Lirthei khaltute leh an phurh ten mask/hmai tuamna an vuah vek tur a ni. Passenger-te hman tur hand sanitizer an pai reng tur a ni. Commercial passenger lirtheite zawm tur kaihhruaina thupek Standard Operating Procedure (SOP) Attachment-2 a dah hi zawm ngei tur a ni.
2. Mizoram chhungah bungraw phur motor-te tlan phalsak an ni.
3. Aizawl Municipal Area chhungah chuan lirthei registration number ‘odd-even’ angin an intlanchhawk ang. Odd number lirtheite chu Thawhtanni, Nilaini leh Zirtawpni-ah an tlan ang a. Even number lirtheite chu Thawhlehni, Ningani leh Inrinni-ah an tlan thung ang. Sunday-ah chuan eng motor mah tlan phal a ni lovang. Hei hian hmundang atanga Aizawl khawpui lo lut tur te a huam ang. Intlanchhawk leh Sunday motor tlan phal loh hian COVID-19 duty Sawrkar hnathawkte motor, ambulance leh medical/veterinary emergency-a hman motor te, Sawrkar leh private hospital-a thawkte motor, print & electronic media mi te motor, Kohhran hminga motor register-te, bawlhlawh paih motor, bawnghnute phurh/sem na motor-te leh LLTF duty-te lirthei a huam lovang.
4. Tul bik thilah SP (Traffic), Aizawl-in, Aizawl khawchhung, Aizawl atanga chhuak tur leh lo lut turte tan phalna (exemption) a pe thei ang.
5. Mizoram chhung chauhva zin veivakte hi COVID-19 symptom nei emaw COVID-19 vei nena contact history nei an nih loh chuan quarantine an ngai lovang.
G. Mipui vantlang tana inkhuahkhirhna hriatturte
1. Hemi hunchhung hian mi 5 (panga) aia tam punkhawm khap tlat a ni. Hei hian Clause E(3)-a inneih inkhawm leh mitthi vui programme a huam lovang.
2. Tul bik thilah lo chuan tumahin mahni in leh compound an chhuahsan tur a ni lo.
3. Tlai dar 7:00 leh zing dar 4:00 inkarah pawn chhuah khap tlat a ni. Hemi atan hian Deputy Commissioner te’n Section 144 CrPC tlawhchhanin inkhuahkhirhna thupek an chhuah ang. Hei hian COVID-19 chungchanga duty te leh Deputy Commissioner-in phalna a pek te a huam lovang.
4. Loh theih loh thil a nih loh chuan, kum 65 chin chunglam te, taksa hriselna lama harsatna nei sa te, nau pai te leh naupang kum 10 hnuailam te chu mahni inchhungah inkharkhip tur a ni.
5. Pawn (mipui/vantlang hmun/puipunna hmun) chhuak tur leh damdawiin a kal tur reng reng chuan (face mask emaw hmanraw dang hmangin) hmai an tuam ngei tur a ni.
6. Vantlang hmun leh dawra kalte chu two(2) metre tala inhlata awm tur a ni.
7. Ram pawn atanga lo lut mikhualte tumahin thlen (mikhual) phal a ni lo. Hei hian Home Department emaw Deputy Commissioner te phalna neite a huam lovang.
H. Mizoram Sawrkar Office
1. Health Department-a medical duty, police, home guards, civil defence, fire & emergency services, disaster management, civil aviation, prisons, excise & narcotics, municipal services, forest field works, PHE leh P&E department-a technical staff te leh Aizawl khawpui pawn lama sawrkar office-te chu a pangngaiin (full strength-in) an kal ang.
2. Sawrkar office dang - Secretariat, directorate, district administration leh field office dangte hawn a ni ang a. Group A & B officer-te chu dan pangngaiin office kal vek tur a ni. Group C & D staff-te erawh chu a chanve zelin an inkal chhawk ang. Secretary, Head of Department emaw Head of Office ten inkalchhawk dan tur an ruahman ang. A tul dan azirin Group C & D staff-te a chanve aia tam pawh kal turin an ruahman thei ang. Constitutional body te leh Mizoram sawrkar hnuaia board, corporation leh statutory body te pawh hetiang hian an kal ang.
3. Sawrkar hnathawk hrisel lohna benvawn nei leh naupaite chu Head of Office ten medical certificate ngai lovin commuted leave an pe thei ang.
4. Head of Office ten khauh takin SOP on Social Distancing an kalpui tur a ni.
5. Office chhungah phalna la hmasa lovin pawnlam mi kal phal a ni lo. Hemi atan hian phone-in emaw an hmuh duhte phalna an la phawt tur a ni.
6. Tul bikah lo chuan meeting neih loh tur a ni. A huhova inrawn/sawiho ngai thil a awm a nih chuan a theih chin chinah video conferencing leh online mode dangte hman tangkai hram tur a ni. Meeting turin District-a officer te Aizawl ah koh loh tur a ni.
7. Department emaw office dangte nena indawr tulna thilah chuan email emaw electronic media dang hman hram tum tur a ni.
8. Mipuiin Sawrkar Department te ral khat atanga an dawr theihna’n Department tinin Information Technology an hmang tangkai tur a ni. Hemi atan hian a tul angin ICT Department-in hma a la ang.
I. Mizoram chhunga office dangte
Mizoram chhunga Central Sawrkar office, Central PSU, RBI, bank, financial institution, constitutional/statutory body te chu an headquarters lam atanga kaihhruaina an dawn angin an kal ang.
J. Hmalakna dang chungchang
Hmasawn nana hmalakna leh mimal eizawnna hna chu phalna hranpa lak ngai lovin kalpui theih a ni. Amaherawhchu, ram chhunga awmsa labour-te chauh ruaia thawh tur a ni. Hnathawktu ten ‘SOP on Social Distancing’ Annexure-2 zawm chungin hna an thawk tur a ni.
K. Hremna dan
He thupek zawm lo chu Disaster Management Act, 2005, Section 51 atanga Section 60, The Mizoram (Containment & Prevention of COVID-19) Ordinance, 2020 leh IPC Section 188 hmangin hrem theih an ni.
Sawrkarin heng thuchhuah a siamte hi a tul dan azirin a ennawnin a tidanglam thei ang.
STANDARD OPERATING PROCEDURE FOR SOCIAL DISTANCING
'Social Distancing' hi mi zinga kan awma inhlat tawk taka awm, 'Physical Distancing' a ni ber a. Chu chuan hnathawhna leh veivah velna zawng zawngah midang nena inhlat tha tawk taka awm hi a kawk a ni. COVID-I9 hri kai theihna - taksa insik, khuh, hahchhiau, chil per leng vel, etc atanga kan him theih nan midang nen meter hnih tala inhlata awm a tul. Lockdown zawh hnu pawhin fimkhur zui a la ngaih viau avangin social distancing hi la hman zui zel a tul em em a ni.
Sawrkar, pawl leh mimal office hrang hrang, sumdawnna leh thil siamna hmun, in leh lo dinna hmanraw lakna hmun hrang hrangte leh ei leh in zawrhna hmuna inkaihhruaina chu a hnuaia tarlan ang hi a ni.
1. SAWRKAR OFFICE, PAWL LEH MIMAL OFFICE TE:
a) Head of Department/Head of Office ten khauh takin pisa chhungah social distancing an kalpui tur a ni. Midang nena indawrin hmai tuamna hman ngei tur a ni.
b) Head of Department/Head of Office tin te chu office vawn fai leh tih thianghlim kawngah mawhphurtu an ni ang a, office chhungah kut silna hmanrua (tui, sahbawn/handwash) an buatsaih ngei ngei tur a ni. Tin, office gate/kawtkaiah kut silna tur emaw hand sanitizer emaw an dah ang a, office building lut tur reng rengin kut an sil vek tur a ni.
c) Office chhungah phalna la hmasa lovin pawnlam mi dawrtu luh tir loh tur a ni.
d) Head of Department/Head of Office ten an office-a lirthei leh bungrua, pawn lam atanga lo lut te chu tih thianghlim (sanitize/disinfect) dan tur an phak tawkin an ruahman ang.
e) Office building leh a chhehvel, a hnuaia tarlan te hi uluk takin tih thianghlim (disinfect) thin tur a ni ang:
i) Office luhka, office kawt leh chhehvel, office building
ii) Office canteen
iii) Meeting room, conference hall, verandah, etc.
iv) Bathroom leh inthiarna (Toilet)
v) Office building bang, step leh step vawnban te.
f) Office bus leh sawrkar lirthei, staff te office kalna atana ruahmanah, registration certificate a seat awm zat chiah passenger phurh tur a ni ang. Driver leh a phurh ten hmai tuamna an hmang vek tur a ni.
g) Office hnathawk, damlohna nei sa emaw hrisel lohna bik nei leh nau paite, office kal thei lo te chu chawlh (Commuted Leave) pek an ni ang.
h) Tul bikah lo chuan meeting neih loh tur a ni. A huhova inrawn/sawiho ngai thil a awm anih chuan a theih chin chinah video conferencing leh online mode dangte hman tangkai hram tur a ni.
i) Department emaw office dangte nena indawr tulna thilah chuan email emaw electronic media dang hman hram tum tur a ni.
j) Bill e.g. electric, tui, phone bill, etc. pekna hmunah te tum khata mi an pun khawm teuh loh nan ruahmanna fel takin siam tur a ni. Online-a bill pek uar ni se.
k) Mipuiin Sawrkar Department-te ral khat atanga an dawr theihna'n Department tinin Information Technology an hmang tangkai tur a ni. Hemi atan hian a tul angin ICT Department-in hma a la ang.
l) Hnathawktute chu chhunah office canteen-a chawl rual vek lova, a inchhawka an chawlh/ei dan tur ruahmanna siam bawk tur a ni.
2. BAZAR, DAWR LEH SUMDAWNNA HMUN TE:
a) Bazar, dawr leh hmundanga kal tur reng reng chuan (face mask emaw hmanraw dang hmangin) hmai an tuam ngei ngei tur a ni.
b) Mi 3 aia tamin dawr pakhat an nghak tur a ni 1o.
c) Dawr nghaktu ten face mask an hmang reng tur a ni. Faina, a bik takin kut sil fai, an uar tur a ni.
d) Dawr neitute'n (dawrtu te inhlat taka an awm theih nan) dawrtu turte dinna tur, meter hnih kar danah an rin lawk tur ani. Dawr chhungah pawh meter hnih a inhlatin an awm tur an ni.
e) Thlai leh chawhmeh dang zuar ten an thil zawrh te fai takin an enkawl tur a ni a, thil zuar reng rengin hmai an tuam ngei tur a ni.
f) Thlai, thei leh sa zawrhna, VLTF/LLTF te'n an ruahmanna-ah mipui an inhnaihchilh loh nan mipui dinna tur meter hnih danah an rin tur a ni. A tul angin bazar hmun bik kher ni lo school kawt zawl, inkhelhna field tual leh hmun remchang dang te pawh a tul anga ruahmanna siam a ni ang.
3.HNATHAWHNA HMUN DANGAH (CONSTRUCTION, MANUFACTURTNG, SERVICES & LOGISTICS)
a. Hnathawhna hmun chu fai takin vawn tur a ni. Hnathawktute inthiarna leh insilfaina tur ruahman ngei tur a ni. Hemi atan hian a neitu/chhawrtu te theuhin mawhphurhna an la ang.
b. Hnathawhna hmunah te hian kum lama upa, damlohna nei sa emaw hrisel lohna bik nei te leh nau paite chu chhawr loh tur a ni.
c. Hnathawhna hmunah te hian tum khatah mi panga aia tam thawh loh hram ni se. Tul bik thila mi panga aia tam thawh a tul a nih pawhin inhlat taka awmin hna thawh tur a ni.
d. Loneitu leh huan neitute, ran vulhtute, sangha dil neitute leh a thawktute pawh an hnathawhna hmunah theuh midang nena inhlat thei ang ber zelin hna thawh tur a ni ang.
e. Puanthuina, lumehna, pheikhawk chhe siamna, etc. ah te mi panga aia tam awm phal a ni lo. A dawr neitu-in ruahmanna a siam ang.
f. Bungraw load leh unload chungchangah bungraw phurtu driver leh handyman te'n hnathawktute an tawk tur a ni lova, unloading pawh hnathawhna hmuna worker te'n an ti fel tur a ni.
MIZORAM CHHUNGA COMMERCIAL PASSENGER PHUR MOTOR TEN AN ZAWM TUR STANDARD OPERATING PROCEDURE
COVID-19 hrileng avangin ram chhung ah harsatna kan tawk mek a. Central Sorkar atangin Lockdown chhungin Commercial Passenger phur motor a chuan dan tur a ruahman a, chu chu tun ah hian a theih ang ang in zawm mek a ni a. Central leh State Sorkar in Lockdown hi a pawtsei leh dawn in a lang a. Lirthei neitute leh vah velna atante mipui harsatna te sutkian a nih theih nan, a hnuai ami ang hian ruahmanna siam a ni.
TWO-WHEELER TAXI
a)Two wheeler Taxi khalhtuten an passenger-te an chhuk veleh midang an chuan leh hmain, uluk takin an lirtheite an sanitize ziah tur a ni.
b) Two wheeler Taxi khalhtu leh Passengerten Mask an vuah ngei ngei tur a ni.
TAXI / AUTO-RICKSHAW
a) Taxi/ Auto-Rickshaw-ah te hian registration certificate a tarlan seating capacity aia tam chuan phal a ni lo.
b) Driver leh Passenger ten Mask an vuah ngei tur a ni.
c) Sanitizer hman tur Taxi/Auto-Rickshaw chhungah a awm ngei tur a ni.
d) Driver-in a zing thei ang berin motor chhung leh vawnbante uluk takin a sanitize thin tur a ni.
MAXI CAB (State chhung leh pawn service)
a)Registration certificate-a tarlan, seating capacity bak passenger phurh phal a ni lo.
b) Driver leh Passenger ten zin kawngah Mask an vuah ngei tur a ni.
c) Driver-in a zing thei ang berin motor chhung leh vawnbante uluk takin a sanitize thin tur a ni.
d) Sanitizer hman tur motor ah a awm ngei tur a ni.
CITY BUS/TOWN BUS/INSTITUTION BUS/SCHOOL BUS/BAZAR BUS/LINE BUS
a) Registration certificate-a tarlan, seating capacity bak passenger phurh phal a ni lo.
b) Driver/ Conductor-te leh Bus-a chuang ten Mask an vuah ngei tur a ni.
c) Sanitizer hman tur Bus-ah a awm ngei tur a ni.
d) City Bus ten turning point an thlen hunah Bus chhung leh vawn bante Sanitizer hmangin uluk takin an tifai thin tur a ni.
Mask vuah leh motor sanitized chungchangah motor enkawltu ten mawh an phur ang.
Heng a chunga ruahmanna siam hi theih tawpa kan zawm tlan chuan COVID-19 hrileng leh darh zau zel tur lakah Zoram mipuite kan him thei dawn a ni. Chuvangin passanger phur chi lirthei enkawltuten theihtawp chhuaha zawm tur leh a tul anga passenger-te ziritr turin kan inngen bawk a ni.
