No.508/2020-2021

Mizoram Scholarship Board (MSB) chuan zirlaite pual Pre-Matric leh Post-Matric Scholarship pekchhuah chungchangah a hnuai ami ang hian thuchhuah an siam :

“India ram chhung mai bakah khawvel pumah Covid-19 hri lengin nunphung leh khawsak a tih danglam avanga kan zirlai rampawna awm ten harsatna nasa tak an tawk hi Mizoram sorkar leh Mizoram Scholarship Board chuan pawi a ti takzet a.

Kum 2017 atang khan Ministry of Tribal Affairs chuan Pre-Matric leh Post-Matric Scholarship pekchhuah dan a tidanglam ta a. Scholarship pawisa kumkhat chhung mamawh a pek thin kha, kum 2017 atang chuan instalment in a pe a, 1st Instalment-ah mamawh chanve, 2nd Instalment-ah 1st Instalment hmanzawhna Utilisation Certificate leh Statement of Expenditure thehluh hnuah 2nd Instalment hi a rawn sanction/release leh chauh thin a. Nikum 2019 pawh khan Second instalment hi May thlaah a rawn pechhuak chauh a ni.

Kumin ah hian 1st Instalment Rs. 2227.53 lakhs chu Ministry of Tribal Affairs atangin hmuh a ni tawh a. Hei hi Mizoram chhunga HSSLC, College zawng zawng leh zirna in thenkhatte a daih chin te chu lockdown hma February, 2020 khan pek vek tawh an ni a.

2nd Instalment hi Rs. 2267.62 lakhs Central atanga rawn sanction leh tur March thla a dawn hman beisei a ni a. Lockdown avangin rawn sanction theih a ni ta lo, ram pawn zirlaite leh Mizoram chhunga zirna in hrang hrang RIPANS, IGNOU, ZMC, Computer Institution hrang hrang, IASE, SCERT, NIELIT, Mizoram Nursing Institution leh DIET te pawh 2nd Instalment atanga pek tura ruahman an ni.

2nd Instalment nghah mek a ni a, Ministry of Tribal Affairs in a sanction veleh ramchhung leh rampawna zirlaite hnenah pek chhuah vat tum a ni. 2nd Instalment pek chhuah a nih theih nan theihtawpa hmalak mek a ni.

Hemi chungchangah hian vawiin (April ni 22) khan Dr.R.Lalthangliana, Minister, H&TE hovin Scholarship Board hotute leh H&TE Officers meeting neih nghal a ni a. Minister hian Ministry of Tribal Affairs hotute phone-in a be nghalin zirlai harsatna tawk te lo ngaipawimawh a a hma thei ang ber a lo tihsak turin a zuk ngen a. Ministry officials te hian lockdown kalpui mek lai nimahse 2nd Instalment release thuai tura hma an lak nghal thu an sawi a, hun rei lo te chhungin sanction hi hmuh theih beisei a ni.”