Nizan khan Mizoram Science Centre Winter Programme, c2019  hawn a ni a. He hawnna hun hi Dr. C. Vanlalramsanga, Secretary, Planning (Sc & Tech) chuan Khuallian niin a hmanpui a ni.

Thusawiin Khuallian, Dr. C. Vanlalramsanga, Secretary, Planning (Sc& Tech) chuan, Science leh Technology hi mimal leh ram hmasawnna hnuk pawimawh tak a ni a, mizote ngei pawh hi kan nitin hnathawhna leh khawsakna ah hian Science thiamna-in a hrinchhuah hmanraw chi hrang hrangte hmang tangkaiin hmasawnna tam tak kan lo nei ve ta a. India ram state dangte bakah ramdangte hmasawnna ke pen ruala pen ve thei turin Mizo thalaite a duhsak thu a sawi a. Mizoram Science Centre in science zirna lamah hna pawimawh tak a thawh thu sawiin Winter Programme, 2019 an buatsaih theite chu a lawmpui thu a sawi a ni hmalam pana rinawm taka an hnate thawk chhunzawm zel turin thawktute duhsakna a hlan bawk.

Mizoram Science Centre Winter Programme, 2019 hawnna hun hi Dr, R.K. Lallianthanga, Chief Scientific Officer, Directorate of Science & Technology chuan a kaihruai a. Khuallian zahawm takin a hun hlu tak senga he hun a rawnhmanpui avangin lawmthu a sawi a. Mizoram Science Centre-ah Innovation Hub leh Space Education Centre te pawh hawn tawh a nih thu sawiin, he Centre hi zirlaite mai bakah mipui mimir tan kartluanin zan dar 8:00 PM thleng December thla chhung hian tlawh theih a nih dawn thu a sawi bawka. Hemi hun rawn hmangtu kalkhawm zawng zawng chungah duhsakna hlanin, hlim taka hun hmang turin a duhsak thu a sawi a ni.

Pu Lalrammawia, Education Assistant chuan report ngaihnawm tak pe in Science Centre din a nih chhoh dan te leh a hnathawh dan tlangpuite a tarlang a. Science Centre-a thil tangkai entur chi hrang hrang awmte sawilangin, ramngaw chanchin tarlanna Forest Gallery te, science thudik tar lanna - Fun Science Gallery te, Education Centre leh Innovation Hub chanchin te, 3D-Theater mi 40 thut theihnate, pawnlama intihhlimna chi hrang hrang awmte a tarlan bakah Auditorium leh Conference Hall a duh apiangte tan a hman hawh theih a awm tel thu a sawi bawk.

Science Centre Winter programme hawnna ah hian zaithiamte bakah Mizoram Science Centre Innovation Hub-a Junior Mentors ten Robotics Show an entir Bawk a ni. Hemi hun hi Mizoram Science Centre Executive Committee Member te, Zemabawk leh Zemabawk ‘N’- a MUP, MHIP, Local Council leh YMA hruaitute, Home Missions School naupangte leh zirtirtute bakah Directorate of Science & Technology-a officers leh Staff ten an hmanpui a ni.

Pu Renthlei Hnuna, curator, Mizoram Science Centre chuan lawmthu sawiin Mizoram Science Centre Programme, 2019 hawnna hmanpuitu zawng zawng chungah lawmthu a sawi a. Secretary, Planning (Sc & Tech) Dr, C. Vanlalramsangan a hun chep tak kara he hun a rawn hman theih avangin a chungah lawmthu a sawi bawk a. Kum 2019 Winter Programme denchhen hian zan lamah dar 8:00 PM thlengin Mizoram Science Centre chu hawn thin a ni dawn ani tih sawilangin mipuite chu hemi hun hmang tangkaia zan lam hunawlah te Science Centre tlawh thin turin a sawm bawk ani.