Nimin (11th July, 2017) tlai khan Mizoram Science Congress 2016 a mi thiam hrang hrangte thuziak, research paper a bu siam - Mizoram Science Congress 2016 Proceedings chu Dr. R.K.Lallianthanga, Chief Scientific Officer leh Member Secretary Mizoram Science, Technology and Innovation Council chuan Aijal Club- ah a tlangzarh.

Proceedings tlangzarh inkhawmah hian Dr. R.K.Lallianthanga chuan Science leh Technology lam thiamna hi Mizoram hmasawnna atan tangkai taka kan hman a pawimawh thu a sawi a.Tunlaiah Mizo scientist-te kawng hrang hranga an thanharh tawh zia leh an tangkai tawh zia tarlangin, inlungruala ram leh hnam tana thawk hova tan la zual sauh sauh turin a chah a ni.

Mizoram Science Congress 2016 Proceedings bu ah hian mi 154 thuziak awmin, Chapter 17 a awm a. A bu hming chu Science Congress thupui ‘Science and Technology for Shaping the Future of Mizoram’ tih a ni. Lehkhabu hi ruahman dan chuan a ziaktute leh Science Congress huaihawtnaa Committee Member-te, partner institution-te leh funding agency viz. North Eastern Council (NEC) leh Department of Science and Technology (DST) Govt. of India hnenah a thlawna pek a ni ang a, chumi hnuah a duh apiang tana neih theih turin Mizo Academy of Sciences website-ah leh Mizoram Science, Technology and Innovation Council (MISTIC) website-ah te download theih turin dah a la ni ang.

Proceedings tlangzarh inkhawmah hian Mizoram Science Congress 2016 Organising Committee Member-te leh Sub-Committee Member engemawzat an tel a, Mizoram Science Congress buatsaihna a bultum tute chu Mizoram Science, Technology and Innovation Council (MISTIC) leh Science NGO hrang hrang- Mizo Academy of Sciences (MAS), Science Teachers’ Association Mizoram (STAM), Mizoram Mathematical Society (MMS), Mizoram Science Congress (MSS), Geological Society of Mizoram (GSM) leh Biodiversity and Nature Conservation Network (BlOCONE)-te an ni a, kum 2018 hian Mizoram Science Congress vawihnihna neih leh nise, tiin rel nghal a ni.