Mizoram Secondary Games vawi-30 na, March ni 27 a tan chu vawiin khan a tiak a. Games kharna programme vawiin khan Ramhlun Sports Complex-a neih chu Pu Chawngtinthanga Parliamentary Secretary in a hmanpui a. Kharna programme-ah hian Pu R.Kapzauva, Deputy Director, School Education Department chuan inlawmna thu sawiin Pu F .Zokima, Games Organizing Secretary chuan report tawi a pe a ni.
Pu Chawngtinthanga chuan Zirna in a tum ber chu mihring a thiamna leh thil tha awmte phawrhchhuah a, kawng engkima hmasawnna thlen tir a ni tiin zirlaite chu an zirlai leh an infiamna te chu a buk bik awm lovin rualkhai taka an kalpui zel a pawimawh thu a sawi a. Zirlai naupangte chu ram nghahfak leh nakin lawk a ram hruaitu an ni dawn a tiin nun fimkhur leh nun uluk a tul thu te a sawi a. Chin dan thalo te paih bo a, tih tak zeta thahnemngai taka ram leh hnam chawimawitu leh a tha zawnga ram leh hnam pholangtu ni turin zirlaite hi Parliamentary Secretary chuan a chah a. Pu Chawngtinthanga chuan inkhelhna hmunhma tha Sorkarin a siam te hi zirlaite chawr tangkaia ram leh hnam hmasawnna atan hmang tura rilru thar siam turin a fuih bawk a ni.
Mizoram School Games vawi-30 na ah hian infiamna chi hrang hrang pakua ah mipa leh hmeichhe naupang tan inelna buatsaih a ni a. Chungte chu – Archery, Athletics, Badminton, Basketball(Mipa tan chauh), Football, Judo, Air Rifle Shooting, Table Tennis leh Volleyball an ni. Games a hian District zawng zawng atangin zirlai an tel kim a, naupang 822 (mipa 478 leh hmeichhia 344) leh an enkawltu zirtirtu 81, sikul 176 atangin an tel a ni. Aizawl District chuan Medal 49(Gold-27;Silver-14 leh Bronze-8) la in Over all Champion an ni a. Runners Up Lunglei District chuan Medal 26(Gold-9;Silver-6 leh Bronze-11) an la a ni. Laltlansanga, Cl-X zirlai, Serchhip H/S, Serchhip District chuan Gold-3 la in mipa naupang zingah Best Athlete a ni a. Hmeichhe naupang zingah Best Athlete, Lalngaizuali Cl-X Chhimtlang Academy Lunglei District chuan Gold -3; Silver-1 leh bronze-3 a la ve thung a ni.
Pu Chawngtinthanga hian inelna hrang hranga ti tha te hnenah lawmman a hlan a. Govt. Mizo High School Band Party in nalh takin kharna programme ah hian Band Display an entir bawk a ni.
