Ni 4 awh tur Mizoram Secondary School Games 2012 chu vawiin chawhma dar 10:30 khan Ramhlun Sports Complex ah School Education Director Pu Lalhmingthanga’n a hawng.

Hawnna thu sawiin Pu Lalhmingthanga chuan zirna-in a tum ber chu kawng tinrenga zirlai tihhmasawn a nih angin zirlaibu ringawt chu a tawk tawh lo va, taksa leh rilru hrisel nan infiamna te pawh mihring chhertu leh tipuitlingtu a nih vek avangin School Games chu buatsaih a nih thin thu a tarlang. School Games chuan zirlaite talent a haichhuah bakah inhmelhriatna, inpumkhatna leh thawhhona tha zawk a siam zel beisei a nih thu te a sawifiah bawk. Mizoram School Games hlawhtling taka neih a nih theih nana Sorkarin engkim a ngaihtuahsak avangin lawmthu a sawi a, Sports Minister Pu Zodintluanga’n an sum mamawh turte State Sports Council atanga a ruahmansak avangin lawmthu a sawi bawk.

Tuna Secondary School Games hman mek hi tum 30-na a ni a, infiamna chu hrang hrang discipline 9 ah intihsiakna nei turin Mizoram District tin atanga school 176 atangin zirlai naupang 822 an tel dawn a ni.