Parliamentary Secretary leh Mizoram Football Association (MFA) President ni bawk, Pu Lal Thanzara chuan, “Thalai infiammite hmakhua thlira Mizoram sorkarin infiamna hmun hma leh thil chi hrang hrang a buatsaihah hian thalai infiammite chu an lawm takzet a ni,” a ti. He thu hi vawiina Mizoram Premier League (MPL) Official Football leh Theme Song tlangzarh inkhawm, MFA-in I&PR Conference Hall-a a buatsaihnaa a sawi a ni.

MFA President Pu Lal Thanzara chuan MFA hmalakna hrang hrangte chu AIFF leh FIFA pawhin hriatpuiin, training hrang hrang a rawn huaihawt thin thu a sawi a. Aizawl Sipai Lammual cheibawl hna chak taka kalpui a nih thu leh 20th September zan hian floodlight hnuaiah MFA Super Cup hmasa ber khelh tum a ni, a ti a; hetah hian MFA Cup Champion, Dinthar FC leh MPL Champion, Chanmari FC te an inkhelh dawn thu leh Mizoram Premier League Season-II hi 26th September, 2013-a tan tura ruahman a nih thu a sawi bawk.

Vawiin inkhawm hi Pu Lalnghinglova Hmar, Honorary Secretary, MFA chuan kaihruaiin, MPL Season-II atana Official Ball chu Scott O’ Donnell, AIFF Head of Coaching chuan a tlangzarh a, Mohammad Basir, AFC Instructor chuan MPL Theme Song (Official Music Video) a tlangzarh bawk. Anni hi AFC ‘B’ Licence Coaching Course, Aizawla neih meka Instructor-te an ni a, MFA-in Mizoram football hmasawnna kawnga an thawhhlawknate chhuanawm an tih thu leh, Mizo footballer tha chherchhuak tura coach tha neih a pawimawhzia hriain, training tam zawk buatsaih anih tur thu an sawi bawk.

MPL Official Football hi Nivia Shining Star Ball a ni a, MPL tan bika siam, MPL logo chuang niin, tun season-a hman tur hian football hi a thlawnin 50 an rawn pe a ni. Nivia hian Mizoram Team, State aiawha fehchhuakte tan Jersey bakah football hmanraw hrang hrangte a thlawnin a tumsak dawn a, grassroot level-a hman tur ballboot leh mawza te man tlawm zawkin a pe dawn bawk a ni. Vawiina tlangzarh tak, MPL Theme Song thupui “Ni E Maw” tih hi Rosangliana (Zorock) phuah leh sak a ni bawk.