No.1596/2020-2021

Mizoram sorkarin Mizoram state pawn lama zirlai ICSE leh ISE Exam la zo lo, Covid-19 hripui leng avanga Mizorama lo hawte tan exam hmabak an la neihte Mizoram chhunga Exam chhunzawm phalsak tura a ngenna chu Council of the School Certificate Examinations(CISCE)-in a phalsak.

Council of the School Certificate Examinations(CISCE) chuan July ni 1-14, 2020 chhunga ICSE leh ISE Examination la zawh fel loh Paper thenkhat exam chhunzawm anih tur thu a puang a. ICSE leh ISE exam hmabak la nei zirlai engemawzat Mizorama lo hawte tan hian School Education Minister Pu Lalchhandama Ralte chuan May ni 26, 2020 khan Ramesh Pokhriyal, Minister of Human Resource Development, Govt. of India hnenah Mizoram chhunga Exam chhunzawm phalsak turin a dil a, MBSE pawhin a lo puih theih tur thu a hrilh bawk. Hemi bakah hian School Education Minister hian May ni 27, 2020 ah MHRD Minister hnenah Central Board of Secondary Education (CBSE) Examination paper la zawh fel loh July ni 1-15, 2020 chhunga neih turah zirlai tangkhangte tan Mizoramah Centre buatsaihsak turin a ngen bawk.

School Education Minister-in a ngen ang hian Council for the Indian School Certificate Examination(CISCE) chuan Covid-19 lenlai a nih avangin paper thenkhat Exam hmabak la nei tan Mizoramah Centre buatsaih a phal thu Mizoram sorkar chuan a dawng ta a, hemi thu hi Gerry Arathoon, Chief Executive & Secretary, CISCE chuan School Education Minister hi E-mail thawnin June ni 1, 2020 khan a rawn hriattir a ni. Zirlaiten paper thenkhat exam hmabak an la neih chungchangah Mizoram sorkarin a thlawpna leh a thawhpuinaah an lawmthu a rawn sawi bawk. Exam buaipuitu tur official te hming leh biak pawh theihna te pawh kimchang taka thawn turin a rawn ngen a ni.