Vawiin chhun khan FMGE&W te chuan I & PR Conference Hall-ah Mizoram Sorkar hnathawh dan leh sum leh pai dinhmun siam thatna atana rawtna hrang hrang an neih te chu an sawi ho. Pu Lalsawta, Finance Minister chuan he hun hi a hmanpui a, rawtna an siam te chu a hnenah thehluh nghal a ni.
Pu Lalsawta chuan Federation te programme chhim theia a awm chu lawmthu sawiin rawtna an sawi leh thehluh chu tha a tih thu leh lo zirchian a tum thu leh mithiam rual pawl in thahnemngai tak leh khun khan taka Mizoram tana tha tur an ngaihtuaha sum leh pai siam that dan leh inrenchema intodelhna tur thu pawimawh tak tak an rawt chhuak chu a hlu in a pawimawh a, vawn that reng chi a ni a ti a. Kan tu leh fate tan Mizoram hi chenna tlakah kan siam zel tur a ni a, Chhura Chengkek lo ang in a ngaihna kan hriat reng pawh hi kan ti mai thin lova, Chhura pawhin chengkek a bul lawka mi a ei duh reng Naa chu nise heti hian a ti mai tur a ti a, amah pawhin a lo in a ti thei mai a, mahse a ti chuang lo. A tha tur anih chuan a nachang kan hriat leh a ngaihna kan hriat hi kan bawhzui zel a ngai a ti a, thil zawng zawng erawh chu a awlsam vek lo, mahse tha tur leh hmasawnna atan chuan inthlakdanglam deuh “Change” te hi a ngaihchang a awm in tihdan hlui te hi tihdan thar thazawka thlak angaih hun a awm thin a ti a, Office kal phungah pawh file kalvel in room hrang hrang a tlawh kual hnem lutuk te hian hun leh tha a heh a, thu hmanhmawh thlak ah phei chuan a muanphah in a pawi thei a, a tihdan thazawk ngaihtuah a hun tawh a ni tiin sum renchem tur pawhin tumah kan bang bik lova, kan tanrual chuan kan thei ang, chuvangin hmalam pan zel in i tangrual ang u a ti.
Pu KS Thanga, Parliamentary Secretary pawhin he hun hi hmanpuiin Federation te hmalakna leh an rawtna chu tha a tih thu sawin theih anga hma lo lakpui a inhuam thu a sawi.
Er. K. Lalsawmvela, Sr. Vice President in programme hi a kaihruai a, Er R. Lalremmawia, President in Power Point Presentation hmangin rawtna an thehluh te entir in a sawifiah nghal bawk.
Kan ram dinhmun dik tak hrechiang tura Economics Baseline Survey kan mamawh dan te, Ration Card chung chang te, Price Control Mechanism mamawh anih dan te bakah VIP zin in thuihruai a ngah lutuk thin te, sorkar suma state pawna trainning rualkhai zawka tihdan tur ruahman, tul leh mamawh loh store a dah ruih a awm em tih enfiah a tul thu leh thil dang tam tak rawtna an thehluh ah hian a tel a ni.
