Mizoram Sorkar chuan Ministry of Housing and Urban Poverty Alleviation hnuaiah Best State Award chi hnih: JNNURM a BSUP & IHSDP hnuaiah Mission Period kum 7 chhunga Best Performing State (in North East & Special Category States/UT’s) leh SJSRY hnuaiah kum 2012-2013 chhunga Best State for Overall Performance (in small states /UT’s) a dawng.

Award semna programme, vawiin ni 21 January, 2014 Vigyan Bhawan, New Delhi-a neihah heng award te hi Mizoram Chief Minister, Pu Lal Thanhawla’n India President hnen atangin a dawng a. JNNURM Award hian trophy bakah tangka fai Rs. 5 lakhs a keng tel a, SJSRY Award hian trophy leh tangkafai Rs. 3 lakhs a keng tel bawk.

Chief Minister hi a nupui Pi Lalriliani, UD&PA Minister Pu Zodintluanga, leh UD & PA Deptt. a Principal Secretary, Pu R.L. Rinawma, Director, Pu K. Lalthawmmawia, leh Pu HVL Zarzoenga, Project Director, SJSRY ten an tawiawm a. Anni bakah hian Pu TP Khound, Adviser to CM; Pu P.L. Thanga IAS (Rtd.), Member Secretary, State Planning Board; Pu Ranbir Singh, IAS, Resident Commissioner, Mizoram House, New Delhi ten Chief Minister hi an tawiawm bawk.

Mizoram sawrkar hnuaia UD&PA Department chuan Jawaharlal Nehru National Urban Renewal Mission (JNNURM) hnuaia Basic Services to Urban Poor (BSUP), Integrated Housing & Slum Development Programme (IHSDP) leh Swarna Jayanti Shahari Rozgar Yojana (SJSRY) hnuaia project hrang hrangte a thawh that avangin heng award te hi Sorkar laipuia Ministry of Housing & Urban Poverty Alleviation in a pe a ni.

JNNURM hnuaia BSUP leh IHSDP ah hian khawpui chhunga mi retheite chenna in sak hna kalpui a ni a. BSUP-ah Aizawl khawpuiah In 1096 sak mek niin, IHSDP-ah hian District Hqrs. khaw 6 ah chenna in 1950 sak a ni bawk a. In sak bakah hian project huamchhungah leh khawchhunga vantlang mamawh (infrastructure) engemawzat siam a ni bawk.

SJSRY hnuaiah hian khawpuia mi rethei te chawikanna tur hmalakna kalpui a ni a. Mi retheite’n eizawnna an neih theihna atan Skill Training chi hrang hrang pek (STEP-UP) te, eizawnna project atan Loan & Subsidy Bank kaltlanga pek (USEP), hmeichhiate Self-Help Group siama Loan & Subsidy leh Revolving Fund hmanga chawikan (UWSP) leh mi retheite inhlawhna (UWEP) te hi SJSRY hnuaiah kalpui a ni.