Mizoram sorkar mi pawimawh zual Council of Ministers, Speaker, Parliamentary Secretaries, MLA leh Department hotu lu zualten vawiin nileng khan I & PR Auditorium-ah sorkar inenkawlna dan leh hrai pawimawh zual deuh deuhte an zirho.

 

 

Administrative Training Institute buatsaih he zirhona hun hi Mizoram Chief Secretary Pu Vanhela Pachuau chuan rawtchhuah anih dan te sawiin a kaihruai a. Training hi Assembly Speaker Pu R. Romawian hawngin Chief Minister Pu Lal Thanhawlan thuhmahruai a sawi a ni.

Assembly Speaker Pu R. Romawia chuan dan leh hrai hriat lohna hi dan bawhchhiat laka thiam channa a ni lo tiin sorkara mawhphurtu bulpui mipui thlan lal Legislator leh a taka thawktu sorkar official-ten hriattur pawimawh tak tak an nei ve ve a. An mawhphurhna te erawh hrang deuh mahse sorkar inrelbawlna ah dan leh hrai hriatna chu thil tul hmasa a ni a ti. Speaker chuan hetiang zirhona buatsaih chu hlawhthlak hlea a rin thu sawiin sorkar hnathawkte chuan eng hna pawh thawk se dan leh hrai anga an thawh chuan chu chuan rah tha leh hlawhtlinna a thlen ang a ti a. Khawtlang inrelbawl dan leh nunphung thlenga invawn a pawimawh thu sawiin tunlai thiamna changkang ber ber leh dan tharlam ber berte man pha zel turin he zirhona a tel te chu a fuih a ni.

Chief Minister Pu Lal Thanhawla chuan rorelna dik fel leh thianghlim, langtlang leh hlemhletna laka fihlim din tur hian sorkar hnathawkte chu hmanraw pawimawh hmasa an nih avangin mipui thlan lal Legislator te tan innghahna an ni a ti a. Hun engemaw kalta atang khan Mizoram sorkar-ah hun vawn dik loh te, inthununna tlakhniam leh hlemhletna nasa tak a awm a ni tiin Chief Minister chuan heng hnathawh kalphung hrim hrim ti tha tur hian theih tawp chhuah mek a ni a ti a. Sorkar hnathawk senior tak takte zingah pawh dan leh hrai lama inzir peih lo tam tak an awm nia a hriat thu sawiin dan tharlam leh pawimawh zawng zawngte chu zira tunlai khawvel thiamna mil zela kal a tul a ni a ti a. Information Technology-te chu sorkar hnathawk ten tun aia nasa zawkin hmang tangkai se office hrang hranga computer-te chu infiam nana hman mai mai tur anih loh zia hre thar turin a chah a. Sorkar sum enkawl danah pawh Budget kalphung leh awmzia hriat a pawimawh a, zir peih a tul a ni a ti.

Vawiina zirhona ah hian Conduct Rules leh inthununna lam chungchangte, Five Year Plan leh Annual Plan kalpui dan te, Office inrelbawl dan leh hnathawh dan hrang hrang chungchangte bakah Budget leh State sum dinhmun zir chiannate neih a ni a. Mizoram sorkar-a mithiam thlanchhuah ten zirtirna hi kaihruaiin sawihona hun leh hrilhfiah ngai laite inhrilhfiaha hun hman a ni.