Vawiin chhun khan Mizoram Chief Secretary Pu Van Hela Pachuau chuan a pisa-ah German bank KfW Development Bank aiawhte a kawm a, India leh Germany inkara Financial Cooperation Programme hnuaiah sik leh sa lo inthlak zel kara mihring dinhmun siamthatna tur  'Climate Change Adaptation (CCA) Programme in the North Eastern Region' ah inremna siampuiin hming an ziak.

He CCA Programme hi India leh Germany sorkarte'n 2009 October-a inremna an lo siam tawh bawhzuina a ni a; India aiawhin DoNER leh Germany aiawhin KfW Bank te hian hma an la a ni. India hmarchhak state 5 - Mizoram, Assam, Nagaland, Tripura leh Sikkim te huamin he programme hi heng state te ecology leh thingtlang mite dinhmun siamthatna tur a ni a.  CCA Project atan hian KfW chuan Rs. Vaibelchhe 450 a rawn thehchhuak dawn a, hlawm 1-na atan heng state 5 te hian Rs. Vaibelchhe 30 theuh an dawng dawn a ni. Mizorama he programme kengkawhtu atan hian Chief Secretary kaihhruaina hnuaiah Mizoram Government Economic Development and Environment Protection Society (MEDEPS) din niin Environment & Forest Department chu Nodal Department a ni. He programme hnuaiah hian sik leh sa danglamin a nghawng nep theih ang ber zawnga eizawnna atana thlai chin leh lo nghet neih te, tui dahkhawl leh leilung vawnhim leh ramngaw humhalh te ngaih pawimawh a ni dawn a, NLUP nen pawh tangruala inthlawp turin ruahman a ni bawk.

KfW Bank aiawha lo kal mi 3 - Pu Gunther Haase, Technical Expert te, Pu Nand Kishore Agrawal, Project Manager leh Pu Oskar von Maltzan, Office Director, KfW Delhi te hian ni 13 June, 2011 khan Aizawl lo thlengin he project atana thlan district 2 (Aizawl leh Mamit) a hmun hrang hrangte an tlawh a. Mizorama ni 4 an cham chhung hian Chief Minister Pu Lal Thanhawla leh Chief Secretary Pu Van Hela Pachuau te an kawm bakah line department hrang hrang leh CYMA aiawh te, MIRSAC aiawh te nen an inkawm bawk.