MAHCO leh Development Commissioner for Handloom, Ministry of Textiles tangkawp buatsaih ni 4 (10 - 13 November, 2015) awh tur Mizoram Special Handloom Expo chu vawiin khan Chief Secretary Pu Lalmalsawma IAS in Assembly Annexe (Basement - I) ah a hawng.

Pu Lalmalsawma chuan Handloom hi eizawnna atana kan hmang dawn a nih chuan tam tham tak ram pawna hralh tla lem loh siam chhuah teuh ai chuan ram dang mite pawhin tha an tih leh lei an zawngchhang theih tura kan siam chhuah a pawimawh a tih thu a sawi a. Mizoram atanga kan thar chhuahte hi kan ram ti hming tha tu a ni zel thei se a duh thu a sawi. Pu Lalmalsawma chuan puantah hmanga eizawngte chu tunlai thiamna hmang tangkai tura fuihin, computer hmanga puan design te pawh uar chho zel turin a chah bawk.

Pu Jack L. Darkim, Registrar Cooperative Societies chu khual zahawm niin puan tah te hi hnam zia pholanga chawimawitu an nih angin helamah hian puantah tute chuan theih tawp chhuah zel turin a chah.

Hawnna inkhawm hi Dr. Zohmangaiha, Chairman MAHCO in a kaihruaia, Expo ah hian Society engemawzat an tel a ni.