Vawiin chawhnu khan Dawrpui Multipurpose Hall-ah Sports Minister Pu Robert Romawia Royte kaihruainain Consultation on Sports Policy of Mizoram, 2019 neih a ni a. He hunah hian  Mizoram Sawrkar leh a enkawl Sports Administrative Body hrang hrang hnuaia inziaklut  Sports Association 34, NGO hruaitute leh  Sports Policy kaihhnawih Department thenkhat aiawh te chuan Mizoramin Infiamna khawvela  hmalak a tum chhoh dan tur khunkhan takin an sawi ho a ni.

Sports Policy chungchanga inrawnkhawmna pawimawh tak kaihruaitu Sports Minister Pu Robert  Romawia chuan ni 365 chhunga Mizoram State Sports Policy 2019 kalpui hman turin chak takin sawrkarin hma a la mek tih a sawi a. He inrawnkhawmna hi a bul tanna pawimawh tak a ni a ti. Sports Policy mumal pawimawhna chhan pathum tarlangin - Sum hman tur nei ngahlo Mizoram ang tan Sports chu policy mumal tak neiin  sumdawng hausa leh company te nen thawk hovin  Industry anga kalpui a ngai  tih a sawi a. Mizoram chhunga sports discipline thenkhat ten hma an sawn chak laia thenkhat hlamchhiah an ni mek te siam thatna tur a tan a pawimawh bakah Sports discipline hrang hrang hruaitute pawhin an mawhphurhna chiang taka an hriat theih nan sawrkar nena thawhhona mumal tak siam pawh a pawimawh tel  a ni a ti. 

Sports chu infiamna ringawt anga luhchilh lovin eizawnna atan hman intihhmuh a pawimawh thu a sawi a. Hemi kawnga hmalakna hmasaber tur atan Siaha-ah Centre of Excellence, Boxing huanga eizawn tum te tan din a ni dawn a. Dicipline dangah pawh hmalak chhoh zel a ni ang a ti. Sports Minister chuan, "Sports thenkhat kan tuipui em em laiin Mizo ten kan khelh thiam em em thin te kha  kan khel ta mang lova; mahse, kan Mizo infiammi ten International Level-ah hlawhtlinna an hmuh meuh chuan kan thiam zawng a ni tih kan hre leh tan mek a ni. Chuvangin Major Game a Medal ang thovin weightlifting, dicuss, javelin, long jump, intlansiak leh a dangah te pawh Gold Medal kan la thei vek a ni tih kan hriat thar a ngai a. Hemi kawnga bul tan nan Mizoram sawrkar chuan sum tam tham tak, State Games huaihawt nan min phalsak tawh a ni", a ti. Training-na hmun leh Game/Match tak tak khelhna hmun thliar hran te ngaih pawimawh a ni dawn a. Media Partner te thawhpui remchanna Hall, Auditorium, Indoor leh Ground te pawh Discipline tin ten hlawk taka kan intawm theih nan Sports Policy-ah pawh hian telh a pawimawh hle dawn a ni a ti. 

Mizoram State Sports Policy 2019 riruang duanna tura inrawnkhawmna hi Sports & Youth Services Director Pu Zothanmawian a kaihruai a. S&Y Joint Director Pu John Tanpuia hnen atangin Sawiho leh ngaihtuah chhunzawm atan Sports Policy ruangam  thlirhona neih a ni a. Hemi hnuah hian he inrawnkhawmna a kal te chuan inpawh tlang takin an ngaihdan, an beisei leh kalphung tha zawk nia an hriatte an inhrilh tlang a. He inrawnkhawnna huna sawihona hi Drafting Committe on Mizoram State Sports Policy 2019 official ten  ziaklut  in an chhinchiah vek a ni.

Vawiina Consultation on Sports Policy of Mizoram, 2019 a sawiho tlangpui Principles of sports Policy chhunga  thupui thenhran te chu - Vision, Policy Principles, Policy Goals And Objectives, Deliverables and Outcomes , Framework and Strategies, Infrastructure Development Integration with Education,  Prioritizing of Sports Disciplines,  Evolution of Sports Competition Calendar, Coach Upgradation and Skill Development, Incentives, Sports Tourism, Mass Media, Asset Management, Adventure Sports and Water Sports, Sports Talent Identification and Training, Coaching Camps and Non-Residential Training Coordination with Stake Holders,  Resource Mobilization and Convergence with other Schemes,  Youth Development and Sports Indigenous Games, Sports for Disabled and Old Persons, Competition Structure, Sports Science, Sports Associations, Role of Private Sector (Corporate Social Responsibility), Institutional Mechanism,  Integration with Youth Policy, leh  Good Governance te an ni.

Attachment

  • Loading attachment...