Vawiin chhun khan Education Minister Pu H. Rohluna leh Health Minister leh MFA President ni bawk Pu Lal Thanzara te hmaah North East Initiative Development Agency (NEIDA)-te hriatpuina in Mizoram Sarva Sikshya Abhiyan (SSA) Mission leh Mizoram Football Association (MFA) te chuan Grassroots Football kalpui tura thawhhona thuthlung (Memorandum of Understanding) chu Directorate of School Education Conference Hall-ah an ziak.
Pu H. Rohluna chuan lehkha zir ngawr ngawr piah lamah infiamna chu zirlaite hmasawn nan a thil pawimawh tak a ni, a ti a. Kan ram phulo a thenawm ramte aia khelmual tha zawk kan nei leh kum reilote chhunga infiamnaah hma kan sawn hi kan ram tana thil chhinchhiah tlak tak a ni, a ti. Bul tan a awl in, a tih puitlin erawh a har tiin, programme ti puitling tur chuan mawhphurtute tan tlan a ngai a ni, a ti a. Grassroots football chungchang pawh sawilangin school timing sawn hma avanga naupangte hun awl hnawh khah nana tangkai, naupangte thanlen nana kaihruaitu remchang a ni, a ti bawk.
Pu Lal Thanzara chuan thawhhona thuthlung ti hlawhtling turin MFA leh District Football Association te’n theihtawpa hma an lak tur thu a sawi a. Mizoten kan lo chik ngai lemloh India football team za zela sawmpanga leh I-League khelh zawh takah 20% bawr vel zet Mizo thalaite an tel thei hi Mizoram mipui zat ngaihtuah chuan a ropui thlawt a ni, a ti a. Grassroots Football hi rawlthar thahnem tak tan eizawnna tha siamsaktu a nih ngei a beisei thu a sawi bawk.
Parliamentary Secretary Pu Joseph Lalhimpuia’n programme hi kaihruaiin Mizoram tana mel lung pawimawh tak, Grassroots Football Academy kalpui tura MFA-te nena an thawhhona chu lawmawm a ti a. Naupangte tana rilru leh taksa insawizawina tha a nih bakah talent hai chhuaktu tangkai tak a nih tur thu a sawi bawk.
Mizoram SSA Mission State Project Director Pu Lalhmachhuana chuan Grassroots Football Academy hi Lawngtlai leh Saiha District tih loh district dang 6-ah kum thum chhung enchhinna kalpui a nih tur thu a sawi a. Project hi a hlawhtling dan a zirin kum thum ral hmain ram pum huap, district tina kalpui theih a nih thu a tarlang. Centre thlan fel tawh 60-ah grassroots chu kalpui tum niin Centre tina coach turte chu training neih tir mek an nih thu a sawi a. Centre tinah hian naupang 50 thlang chhuakin, a tlem berah hmeichhe naupang panga tal thlan an nih tur thu a sawi bawk.
MFA Joint Secretary Pu C. Vanlalmawia chuan MFA in a hmalakna hrang hrang a tarlang a. India ramin kum 2017-a U-17 World Cup a thlen tur khawpui paruk zingah Aizawl chu tel lo mahse, Mizoten hma kan sawn nasat avangin MFA thuam chak tura hma lak mek a nih thu leh Marketing Officer leh Technical Officer FIFA atanga pek an nih tawh thu a tarlang. Sairang Dinthar-ah artificial grass phah tura inbuatsaihna a kal mek thu a sawi bawk.
Mizoram SSA Mission Addl. State Project Director Pu V. Lalsiamthara’n lawmthu sawiin programme hi a khar a. Education Department, MFA leh Mizoram State Sports Council aiawhte programme ah hian an tel a ni.
