1775/2026-2027

Dated Aizawl, the 13^th August, 2026 : Mizoram State Commission for Protection of Child Rights (MSCPCR) chuan naupang kaihhnawih pawikhawihna a thlenin, dan anga naupangte dikna leh chanvo pek a nih bakah an nihna humhim kawngah mipuite leh media-te fimkhur lehzual turin a ngen.

Hursualna kaihhnawiha naupangte - a tuartu emaw, a tisualtu emaw pawh nise, POCSO Act, 2012 Section 23 in a sawi angin, an hming, thlalak, veng leh khua, etc., emaw, anmahni chhui chhuah theihna tur lam zawngin thuchhuah leh thehdarh a khap tlat a ni.

Tunhnaiah kan thenawm state, Assam Cachar District-ah Mizoram mi kumtlinglo pahnih (2) te chu rukbo leh pawngsual an tawk hi Commission chuan pawi a ti tak zet a, pawikhawihtute man thuai an ni hi lawmawm a tiin, dan anga dik taka an chungthu rel fel thuai a nih theih nan Assam State Commission for Protection of Child Rights (ASCPCR) pawh hriattir an ni.

Pawl hrang hrang ten Sawrkar laka lungawilohna leh nawrh an huaihawt thinah zirlai, kum tlinglo an tel tir thin hi naupangte hmakhua leh an tana tha ber (best interest) a nih loh avangin hetiang nawrh leh lungawilohna lantirna reng rengah naupangte hmatheh tawh lo turin Commission chuan mipuite a chah bawk.