No.186/2021-2022

Aizawl the 19th April, 2021: Vawiin khan Mizoram State Cooperative Service Association chuan Cooperation Minister Pu C. Lalrinsanga’n Mizoram State Cooperative Service a enkawl danah an lungawizia leh a laka an lawmzia lantir nan thilpek leh citation an hlan.

He hunah hian Minister Pu C. Lalrinsanga chuan thu sawiin sawrkar hnathawk ten harsatna an tawh hrang hrang sawrkarin a hria a, a theih chin china chinfel zel pawh hi sawrkar duhdan a ni a ti a. Chutih rualin sawrkar hnathawkte pawhin kan harsatna tawh leh kan facility piah lamah kan hna hi Pathian rawngbawl hna a ni tih hre thar leh ila, I tang thar zel ang u tiin a sawi a, hei bak hi chu ram dang kan nei lo tih hriaiin he ram min petu kan Pathian duh dan ang taka ram ropui ni turin taima tak leh rinawm takin i thawk zel ang u tiin a fuih a ni.

Mizoram Cooperative Service Association hi Cooperation Department hnuaia thawktu intelkhawm pawl lian ber a ni a. Kum engemaw zat chhunga an service chungchanga harsatna an lo tawh thin hrang hrang te chu Minister Pu C. Lalrinsanga chuan kum 2018 atanga Cooperation Department a enkawl hnuah chinfelin a lo awm ta a. Junior Inspector of Cooperative Societies leh Senior Inspector te chu an Minister-in theihtawp a chhuahsakna zarah amalgamate niin tunah hian Service Rules pawh a thar hlakin an nei thei ta a. Hei hian promotion leh service kaihhnawih thil tam taka an harsatna tawh thin chu a rawn su kiang ta a. MSCSA chuan hetiang taka an harsatna hriatthiamsak a, a chinfelna kawnga theihtawp chhuaha hma laksaktu Minister an nei hi an lawm tak meuh meuh a ni tih an sawi a ni.

Vawiin programme ah hian Mizoram State Cooperative Service Association te hi Pu Lalrinsanga, Registrar of Cooperative Societies in a ho a ni.