Vawiin khan Secretariat Conference Hall-ah Information Technology hmanga Sawrkar inrelbawlna tih changtlun leh chumi atanga mipui ten awlsam zawka government service a an mamawh hrang hrangte Sawrkara an dil leh dawr theih dan tur ngaihtuahtu Committee sang ber Mizoram State e-Governance Apex Committee chu Chief Secretary Pi L Tochhong kaihruaina hnuaiah an thukhawm. He meeting ah hian Department hrang hrang Secretary-te leh Department aiawh te bakah World Bank aiawh pathum an tel a ni.
Chief Secretary chuan mipuiin awlsam zawka Sawrkar an dawr theihna tur leh an mamawh hrang hrang te IT kaltlanga pek hi NeGP tum ber a ni a ti a, hemi atan hian Department hrang hrang tan ho a tul thu a sawi bawk. Meeting-ah hian Pu Lalthlamuana, Chief Informatics Officer, ICT Department chuan National e-Governance Project (NeGP) hnuaia ruahmanna hrang hrang kalpui mekte thlen chin leh hemi atana hma an lak dan te power presentation hmangin a tarlang a.
NeGP hnuaia project kalpui mekte hi district leh block headquarter zawng zawng te Aizawl nen inthlunzawmna Mizoram State Wide Area Network (MSWAN) te; Sawrkar leh Department hrang hrang ten an data an dah thatna leh IT hmanga an service hrang hrang vawnna State Data Centre (SDC) te; Common Service Centre leh Rural Information Kiosk te; State Service Delivery Gateway (SSDG) leh State Portal (SP) te leh e-District te an ni.
MSWAN hi July 2012 khan hawn niin State Data Centre hi tun thla chhunga hawn beisei a ni a. Mizoram khawpui hrang hrangah hian Common Service Centre 136 din tura ruahman niin engemaw zat chu din ni tawh in hna pawh an thawk tan tawh a. Zokhaw lamah chengte pawhin awlsam zawka sawrkar an dawr theihna tur Rural Information Kiosk 300 vel ruahman niin heng zingah 240 te chu thlan fel ni tawhin a khawl pawh pek an ni tawh a. CSC leh RIK te hi a veng leh khaw mi thlanchhuah ten enkawl in an tan eizawnnna kawng tha tak ni thei tura beisei an ni.
State Portal hi mipuiin awlsam zawka government service hrang hrangte an dil theina tur leh hengte hi hmun khata dahkhawmna a ni. e-District hi IT hmanga mipuiin awlsam zawka DC in a pekchhuah certificate hrang hrang te, Ration Card chungchangte, LSC kaihhnawih form chungchang te an office a kal kher lova dil dan ruahmanna niin a Pilot Project hi May 2012 khan tan a ni.
Vawiin meeting chuan e-District hnuaia ruahmanna chhawpchhuah te chu a pawmpui a, e-District hnuaiah hian service hrang hrang 10 dah a ni.
IT hmanga Sawkar inrelbawlna tihchangtlun leh siamthat na tura project tunhnaia ICT Department in World Bank project vaibelchhe 72 man hu an hmuh ‘Improvement of Government’s administrative processes and quality of service delivery mechanism in Mizoram’ tih pawh meeting ah sawiho a ni a, hemi chungchangah hian World Bank atanga lokal Pu Vikram Chand’n presentation a nei bawk. He Project-ah hian Department thlanchhuah 33 te service hrang hrang 100 vel fuankim beisei a ni.
