Vawiin khan Mizoram State Geological Programming Board Meeting vawi 17-na  Secretariat Conference Hall, New Secretariat Complex-ah neih a ni a. Geology & Mineral Resources Minister Pu S.Hiato chu khuallian niin Meeting hi Directorate of Geology &Mineral Resources Commissioner leh Director ni bawk Pu R.L Rinawma’n a kaihruai a ni.

Minister chuan Scientists, Engineer, sorkar mi pawimawh mithiam tak tak Mizoram chhung leh pawn atanga lokal te telna meeting-ah hian Geology leh Mining lama he State hmasawnna tur thil pawimawh leh hlu tak  an phawrh chhuah ngei a beisei thu a sawi a. Mizoram  chu India ram hmarchhak bung zimte ni mahse he State-ah hian leilung hausakna chi tin reng haichhuah hmabak a inphum a, chung zinga pawimawh em em Oil leh Natural Gas haichhuak tur chuan India ram chhung leh Foreign ram atangin company 9 in hna an thawk mek a. Thla reiloteah Mizoram pawh hi India Hydrocarbon Map-ah a chuan ve ngei a beiseiawm thu a sawi a ni.  Lirnghing, leimin leh chhiatrupna lo thleng theite hre renga, khuanu thilsiam leilung leh boruak ti chhe lo zawnga Mizoram leilung hausakna haichhuah hna hi tluang taka thawh ngei a nih a beisei thu Minister hian a tarlang nghal bawk a ni.

Directorate of Geology & Mineral Resources (DGM), Mizoram leh Geological Survey of India (GSI)  in 2010-2011 chhunga an hmalakna te leh 2011-2012 chhunga DGM hnathawh dan tur ruahman lawk tlangpui te he meeting-ah hian an tarlang a. Directorate of Geology & Mineral Resources (DGM) hian Oil zawngtu te (Minor Mineral and Oil & Gas Sector) hnen atangin sum cheng vaibelchhe 6.56 leh lung Quarry leh balu lakna permit bakah chhiah an lak atangin sum cheng vaibelchhe 1.54 chu 2010-2011 chhung khan an la lut a, Mining Permit 97 leh Sand Permit 30 an pechhuak a ni. Oil leh Gas zawn hna thawk mektu Company te hian  Mizoram chhung area 12427 Sq Km (58.9%) huam chhungah hna an thawk a ni.

Vawiin meeting-ah hian Agenda 6 ngaihtuahho a ni a. Vanchengpui khua a Geo-park siam chungchang te, GSI leh DGM, Mizoram tangkawpin Saiha leh Lawngtlai a leimin nasatna hmun zirchian te, Multi Modal Transport Project kalpuina Saiha leh Lawngtlai District a Mineral Resource Mapping siam te, Total Station hman dan tur training neih chungchang te, lirnghing a thlen palha inven a awlsam theih nan Mizoram chhunga leikhi awmna hmun zirchian chungchang te bakah GSI Unit Mizoram a hawn  ve chungchang te ngaihtuah a ni a. An thurel te hi a tul dan a zirin thuneitu sang zawk Central Geological Programming Board meeting-ah thawn thlak a, ngaihtuah zui leh tur a ni.

He meeting-ah hian GSI lam atangin Field Training Centre Director, Tripura-Mizoram Circle Director leh Senior Geologist te an tel a, Mizoram University atangin Geology Head of Department bakah sorkar Department hrang hrang atangin mi pawimawhte an tel a ni.