Vawiin chawhnu khan Chief Minister Pu Lal Thanhawla hovin Mizoram State Health Care Society (MSHCS) Governing Board chu Chief Minister Office-ah an thukhawm a. Meeting-ah hian Health & Family Welfare Minister Pu Lal Thanzara leh MSHCS Member-te an tel a ni.

Khawsak harsa zawkte tan damloh nikhua a inenkawlna sawrkarin a chhawmdawlna scheme RSBY (Rashtriya Swasthya Bima Yojana) hmanlai mek chu sawrkar laipuiin a beisei angin Pradhan Mantri Jan Arogya Yojana (PMJAY) a thlak a ni dawn a. Hemi chungchanga thu lawimawh hrang hrangte vawiin Health Care Society Governing Body thukhawm chuan an sawiho a ni. PMJAY hian RSBY hnuaia inziaklut tawh sa te leh Rural Development SECC (Socio Economic Caste Census) in mi harsa zual (deprived criteria) ah a dah te chu a huam nghal dawn a. Hemi bakah hian vawiin Committee chuan tuna state sawrkarin chhungkaw khawsak pangngai - Above Poverty Line chhungkua te tana Mizoram State Health Care Scheme (MSHCS) a siam chu PMJAY nen hian thlumzawm ni se tiin a rel bawk.

PMJAY hnuaiah hian cheng nuai 5 thleng inenkawlna senso hi bill theih dawn a; MSHCS hnuaiah cheng nuai 3 thleng bill theih thin a ni. MSHCS hnuaiah hian natna khirh zual (critical illness) chauh bill phal thin a ni a, PMJAY hnuaiah chuan zau zawkin natna chi hrang hrang 1395 chuang bill phal a ni dawn a. MSHCS hnuaia chhungkaw member 5 chin tan bill theih thin kha PMJAY hnuaiah chuan chhungkaw member bill phal zat bithliah a awm tawh dawnlo a ni.

Vawiin meeting-ah hian PMJAY kalpui a nih hnu a sawrkar hospital te claim chungchanga inkaihhruaina tur te, PMJAY avanga thawktu thar lak mamawh chunghchang te leh tul dangte sawiho a ni bawk.